AMahubo 111

₁Makadunyiswe uSimakade!

Ngiyakumbonga uSimakade ngenhliziyo yami yonke

enhlanganweni nasebandleni labaqotho.

₂Mikhulu imisebenzi kaSimakade,

bazindla ngayo bonke abayithokozelayo.

₃Ugcwele udumo nobukhosi umsebenzi wakhe,

nokulunga kwakhe kumi phakade.

₄Wenze ukuba izimangaliso zakhe zikhunjulwe,

uSimakade unomusa nobubele.

₅Abamesabayo ubapha ukudla,

isivumelwano sakhe usikhumbula njalo.

₆Abantu bakhe ubabonise amandla

emisebenzi yakhe,

ngokubapha ifa labezizwe.

₇Imisebenzi yezandla zakhe yethembekile,

futhi ilungile,

yonke imithetho yakhe iqinisekile,

₈imiswe ngeqiniso nangobuqotho,

ukuba ime ingunaphakade.

₉Wathumela ukuhlengwa kubantu bakhe,

wamisa isivumelwano sakhe

kuze kube phakade.

IGama lakhe lingcwele,

futhi liyesabeka.

₁₀Ukumesaba uSimakade kungukuqala kokuhlakanipha,

banengqondo ehluzekile bonke abenza lokho.

Udumo lwakhe lumi kuze kube phakade.