AMahubo 10

₁Simakade, kungani umele kude na?

Uzifihlelani ngezikhathi zokuhlupheka na?

₂Ngokuqhosha, ababi bahlupha abampofu.

Mababanjwe emacebeni abawacebileyo.

₃Isikhohlakali siyazigabisa ngokufiswa yinhliziyo yaso.

Abanomhobholo bayaqanganisa,

bedelela uSimakade.

₄Isikhohlakali siyazigqaja,

asifuni ukubuyela kuwe,

ngisho nje ukuba sicabange ngawe.

₅Izindlela zaso zethembekile izikhathi zonke;

izehlulelo zakho ziphakeme kakhulu

kunokubona kwaso;

zonke izitha zaso uyazidelela.

₆Enhliziyweni yaso sizindla sithi:

“Angisoze ngazanyazanyiswa,

izizukulwane ngezizukulwane,

angisoze ngahlupheka.”

₇Umlomo waso ugcwele iziqalekiso,

inkohliso nencindezelo;

phansi kolimi lwaso kukhona ukuganga nobubi.

₈Silala unyendle emizini,

ezindaweni ezinamathunzi,

ukuze sibulale ongenacala;

amehlo aso abheke labo abangenamandla.

₉Sicuthisa okwebhubesi elilambile ehlozini,

sethembe ukubamba ohluphekileyo,

simhudulele ogibeni lwaso.

₁₀Siyakhokhoba,

simnyonyobele,

simshaye phansi ngamandla aso.

₁₁Siyacabanga sithi enhliziyweni yaso:

“UNkulunkulu akanakile,

akabhekile ngakimi,

futhi ngeke angibone.”

₁₂Simakade Nkulunkulu, yima ngomumo!

Bonakalisa amandla akho,

ungamkhohlwa osekuhluphekeni.

₁₃Nkulunkulu, kungani ukuba isikhohlakali

sikwedelele sicabange sithi:

“Ngeke wangenza lutho,” na?

₁₄Kepha Wena uyamqaphela osenkathazweni nasosizini,

wenze okuthile ngaye.

Abampofu bangethembela kuwe,

nezintandane ngokunjalo.

₁₅Nqamula imisipha yengalo yesonakali,

ujezise ababi ngenkohlakalo yabo,

iphele ingabe isaphushwa nakuphushwa!

₁₆USimakade uyobusa ingunaphakade,

abezizwe babhujiswe ezweni lakho.

₁₇Simakade, uyakuzwa ukukhala

kokulangazelela kwabahluphekileyo.

Ubanikeza ithemba,

bese ukulalela ukukhala kwabo

becela usizo;

₁₈umela izintandane nabacindezelweyo,

ukuze kungabi bikho namunye emhlabeni,

ozoba yingozi komunye.