UNehemiya 9

“Sukumani nidumise uSimakade uNkulunkulu wenu,

kusukela phakade, kuze kube phakade.”

“Malibongwe iGama lakho elidumisekayo

neliphakeme phezu kwakho konke

ukubonga nokudumisa.”

₆“Nguwe wedwa onguSimakade,

nguwe owenza izulu,

izulu lamazulu,

nayo yonke imikhosi ekulo,

umhlaba nakho konke okukuwo,

nezilwandle nakho konke okukuzo,

konke ukuphe ukuphila,

imikhosi yasezulwini iyakukhothamela.”

₇“Wena unguSimakade,

uNkulunkulu owakhetha u-Abhrama,

wamsusa e-Uri lamaKhaledi,

waguqula igama lakhe,

waba ngu-Abhrahama.

₈Wayithola inhliziyo yakhe

yethembekile kuwe,

wenza isivumelwano naye,

wethembisa ukwabela abozalo lwakhe

izwe lamaKhanani, amaHithi,

ama-Amori, amaPherizi,

amaJebusi namaGirigashi,

wakufeza owawukwethembisile

ngokuba ulungile.”

₉“Wakubona ukuhlupheka

kokhokho bethu eGibhithe

nasoLwandle Lomhlanga,

wakuzwa ukunxusa kwabo.

₁₀Wenza izibonakaliso nezimangaliso ezinkulu

phambi kukaFaro nezinceku zakhe,

nabo bonke abantu baseGibhithe,

ngoba wawazi ukuthi babaphathe ngonya

olunjani abantu bakho.

Wazakhela igama elisamile kuze kube namuhla.

₁₁Ulwandle waludabula kabili

ukuze bawele behamba emhlabathini owomileyo,

kodwa ababehubha u-Israyeli

wabaphonsa ekujuleni,

bazika njengetshe emanzini anamandla.

₁₂Emini wawubahola ngensika yefu,

ebusuku ngensika yomlilo

eyayibakhanyisela endleleni

ababehamba kuyo.”

₁₃“Wehlela entabeni iSinayi,

wakhuluma nabo usezulwini.

Wabanika izehlulelo ezilungileyo,

imithetho eliqiniso,

izimiso nemiyalelo emihle.

₁₄Wabazisa ngeSabatha lakho elingcwele,

wabashayela imithetho,

izimiso nemiyalelo ngenceku yakho uMose.

₁₅Lapho belambile,

wabanika isinkwa esivela ezulwini,

waqhumisa isiphethu edwaleni,

ukuze baqede ukoma.

Wabatshela ukuba bangene ezweni

owawubethembise lona ngesifungo,

ukuthi uyobanika lona.”

₁₆“Kepha bona nokhokho bethu

benza ububi,

baziphakamisa,

baba nenkani,

bayephula imiyalelo yakho.

₁₇Benqaba ukukulalela,

abaze bazikhumbula izimangaliso

owazenza phakathi kwabo,

kepha baqinisa amakhanda,

bazimisela ukubuyela ebugqileni.

Kodwa Wena unguNkulunkulu othethelelayo;

onomusa nesihe,

uyephuza ukuthukuthela,

ugcwele isihawu,

ngakho-ke awuzange ubalahle,

₁₈ngisho lapho sebezibumbele umfanekiso wethole,

bethi: ‘Lona nguNkulunkulu wethu,

owasikhipha eGibhithe,’

nalapho benza amahlazo esabekayo.

₁₉“Nokho awubalahlanga ehlane,

ngenxa yobubele bakho obukhulu.

Emini insika yefu ayiyekanga

ukubahola endleleni yabo,

nasebusuku insika yomlilo

yaqhubeka yabakhanyisela

endleleni yabo.

₂₀Wabanika uMoya wakho omuhle, ukubafundisa.

Awuzange ubancishe imana yakho,

wabuye wabanika amanzi okucima ukoma.

₂₁Iminyaka engamashumi amane,

wabanakekela ehlane;

abantulanga lutho,

izingubo zabo aziguganga,

nezinyawo zabo azivuvukalanga.

₂₂“Wanikela kubo imibuso nezizwe,

wandisa imingcele yabo.

Badla izwe likaSihoni,

inkosi yaseHeshibhoni

nelika-Ogi, inkosi yaseBhashani.

₂₃Izizukulwane zabo wazandisa

njengezinkanyezi esibhakabhakeni,

waziletha ezweni

owawulethembise okhokho bazo

ukuthi ziyongena kulo, zilidle.

₂₄Izizukulwane zabo zangena

kulo, zahlala.

Labo ababehlala kulelo lizwe,

wabenza bakhonza kuzo.

AmaKhanani namakhosi awo

nabanye abantu ababehlala ezweni,

wabanikela kuzo

ukuba zibaphathe ngokuthanda kwazo.

₂₅Banqoba imizi ebiyelweyo

nezwe elivundileyo;

badla izindlu ezigcwele

yonke into enhle,

imithombo embiweyo,

izivini, amasimu emikhiwane

nezithelo eziningi ezidliwayo.

Badla, basutha, banonophala,

bawuthokozela umusa wakho omkhulu.

₂₆“Kodwa abalalelanga,

bakuhlubuka,

bawufulathela umthetho wakho.

Babulala abaphrofethi bakho,

ababebagqugquzela

ukuba babuyele kuwe;

benza amahlazo enyanyekayo.

₂₇Wawusubanikela ezitheni zabo

ukuba zibacindezele.

Kepha lapho sebesenhluphekweni,

bakhala kuwe,

wabezwa usezulwini,

ngesihawu sakho esikhulu,

wabanika abakhululi

ukubakhulula ezitheni zabo.

₂₈“Kepha kuthe sebehleli ngokuthula,

babuye benza okubi emehlweni akho.

Wawusubayekela ezitheni zabo

ukuze zibabuse.

Kwathi lapho sebekunxusa,

wabezwa usezulwini,

ngesihawu sakho wabakhulula futhi.

₂₉Wabexwayisa ukuba babuyele

emthethweni wakho,

kodwa baba nenkani,

abaze bayilalela imiyalelo yakho

nezehlulelo zakho.

Bona bephula izimiso zakho,

okuthi uma umuntu ezigcina aphile.

Bakufulathela,

baqinisa amakhanda,

benqaba ukukulalela.

₃₀Wababekezelela iminyaka eminingi,

wabexwayisa ngoMoya wakho,

wakhuluma ngabaphrofethi bakho,

kodwa abakugqizanga qakala lokho,

ngakho-ke wabanikela kubantu abakhelene nabo.

₃₁Nokho ngomusa wakho omkhulu,

awubabhubhisanga,

futhi awubalahlanga,

ngokuba unguNkulunkulu onesihawu nomusa.

₃₂“Ngakho-ke, Nkulunkulu wethu,

Nkulunkulu omkhulu,

onamandla nowesabekayo,

uhlale usigcina njalo

isivumelwano sakho somusa.

Yonke le nkathazo esehlelayo

mayingabi ncane ebusweni bakho,

thina namakhosi ethu,

nezikhulu zakithi,

nabaphristi bakithi,

nabaphrofethi,

nawokhokho,

nabo bonke abantu bakho,

kusukela ezinsukwini zamakhosi ama-Asiriya

kuze kube namuhla.

₃₃Nokho bewufanele

ukusehlisela zonke lezo zinto;

wenze okulungileyo,

thina senza okubi.

₃₄Amakhosi ethu,

abaholi bethu,

abaphristi nokhokho

abawugcinanga umthetho wakho;

abayinakanga imiyalelo yakho

nalapho ubaxwayisa.

₃₅Ngisho embusweni wabo,

ebuhleni obukhulu obenzele bona,

nasezweni elibanzi nelivundileyo obanike lona,

abazange bakukhonze,

abaphendukanga emisebenzini yabo emibi.

₃₆“Awubheke nje,

siyizigqila namuhla,

izigqila ezweni owalinika okhokho bethu

ukuze badle izithelo zalo,

nokunye okuhle elikukhiqizayo.

Bheka-ke, sesiyizigqila manje.

₃₇Ngenxa yezono zethu,

isivuno salo esikhulu

sesidliwa ngamakhosi

owabeke phezu kwethu.

Abusa thina nemfuyo yethu

ngokuthanda kwawo.

Sisenhluphekweni enkulu.”