UMikha 1

₂Yizwani nonke bantu,

ulalele mhlaba nakho konke okukuwe,

iNkosi uSimakade izofakaza imelene nani,

iNkosi ivela ethempelini layo elingcwele.

₃Ngokuba uSimakade usezakuphuma endaweni yakhe,

ehlele phansi,

anyathele ezindaweni eziphakemeyo zomhlaba.

₄Izintaba ziyakuncibilika phansi kwakhe,

izigodi ziqhekezeke njengengcina phambi komlilo,

nanjengamanzi ethelwa emehlelweni.

₅Konke lokhu kungenxa yesiphambeko sikaJakobe,

nangenxa yezono zendlu ka-Israyeli.

Ngubani owaphambukisa uJakobe?

Akusilo yini iSamariya na?

Ngubani izindawo eziphakemeyo zakwaJuda?

Akusilo yini iJerusalema na?

₆Ngiyakwenza iSamariya libe yindunduma yemvithi yasendle,

libe yindawo yokutshala imivini.

Ngithululele amatshe alo esigodini,

ngivumbulule izisekelo zalo.

₇Zonke izithombe zalo ziyakuphihlizwa,

konke elikukhokhelweyo kushiswe ngomlilo.

Izithombe zalo ezibaziweyo

ngiyakuzenza zonke zibe yincithakalo,

ngokuba likuthole ngenkokhelo yobufebe,

futhi kuyakubuye kube yinkokhelo yobufebe.

₈Ngenxa yalokhu ngiyakukhala,

ngikhihle isililo,

ngihambe ngingafake zimbadada,

ngihamba ze,

ngiklewule njengempungushe,

ngilile kube sengathi ngamazinyane entshe.

₉Ngokuba izilonda zalo azelapheki,

lokhu sekuze kwafika nakwaJuda,

kwafinyelela nasesangweni labantu bami, eJerusalema.

₁₀Ningasho lutho eGathi,

ningalokothi nilile.

Zinginqeni othulini eBhethi Leyofra.

₁₁Dlulani nqunu ninehlazo

nina enihlala eShafiri.

Nina enakhe eZanani ngeke niphume,

isililo eBhethi Ezeli siyakunithathela

lokho enithembele kukho.

₁₂Ngokuba abakhe eMarothi

basezinhlungwini ezinzima,

balindele okuhle,

phela inhlekelele yehlile ivela kuSimakade,

ifike esangweni eJerusalema.

₁₃Nina enihlala eLakhishi,

bophelani ihhashi enqoleni,

kube kunguqala kwesono

sendodakazi yaseZiyoni,

ngokuba iziphambeko zika-Israyeli zitholakale kuwe.

₁₄Ngakho-ke iMoreshethi Gathi

uyakulipha izipho zokuvalelisa.

Izindlu e-Akhizibi ziyakuba yinkohliso

emakhosini akwa-Israyeli.

₁₅Nina zakhamuzi zaseMaresha,

ngizakunithumelela futhi umthumbi,

udumo luka-Israyeli luyakufika e-Adulami.

₁₆Gunda ube yiphandla,

ngenxa yabantwana obathandayo,

uyandise impandla yakho njengenqe,

ngokuba baya ekuthunjweni.