NgokukaLuka 21

₁Kwathi lapho ebheka, wabona izicebi zifaka iminikelo yazo emphongolweni womnikelo. ₂Wabona futhi nomfelokazi othile, ompofu, efaka kuwo izinhlamvana zemali ezimbili. ₃UJesu wayesethi: “Ngiqinisile ngithi kini: lo mfelokazi ompofu ufake okuningi kunabo bonke. ₄Ngokuba bonke laba abanye bafake emnikelweni bethatha kokuningi; kodwa yena ekuntuleni kwakhe, ukhiphe konke abephila ngakho.”

₅Kwathi abanye besababaza ubuhle bethempeli ukuthi lihlotshiswe ngamatshe amahle nangezipho ezinhle, uJesu wayesethi kubo: ₆“Kuyakufika izinsuku lapho kulokhu enikubonayo, kungayukushiywa itshe phezu kwelinye elingayukudilizelwa phansi.”

₇Base bembuza bethi: “Mfundisi, lokhu kuyakwenzeka nini, futhi siyakuba yini isibonakaliso sokuthi sekuzakwenzeka na?”

₈Wathi: “Qaphelani, ningadukiswa, ngokuba kuyakuvela abaningi egameni lami, bathi: ‘Nginguye,’ babuye bathi: ‘Isikhathi sesisondele.’ Ningabalandeli. ₉Uma nizwa ngezimpi nangeziyaluyalu, ningesabi, ngokuba kufanele ukuba zenzeke lezi zinto kuqala, kodwa kuyobe kungakabi umhla wokuphela.”

₁₀Wayesethi kubo: “Isizwe siyakuvukela isizwe, nombuso uvukele umbuso. ₁₁Kuyakuba khona ukuzamazama komhlaba okukhulu, kubhoke indlala ezindaweni eziningi, kube khona ubhubhane, izinto ezesabekayo nezibonakaliso ezinkulu ezivela ezulwini.

₁₂“Kepha kungakenzeki konke lokho, bayakunibamba, banihluphe, banikhaphele emasinagogeni nasemajele, baniyise phambi kwamakhosi nababusi ngenxa yegama lami. ₁₃Lokhu kuyakuninika ithuba lokuba nifakaze. ₁₄Ngakho-ke kugcineni ezinhliziyweni zenu ukuze ningazindli ngokuthi niyakuziphendulela nithini, ₁₅ngokuba Mina ngiyakunifunza amazwi nokuhlakanipha abangayukwazi ukumelana nakho noma baphikisane nakho bonke labo abalwa nani. ₁₆Impela niyakukhashelwa ngisho ngabazali, abafowenu, izihlobo nabangani; abanye benu bayakubulawa yibo. ₁₇Niyakuzondwa yibo bonke ngenxa yegama lami. ₁₈Nokho akuyukulahleka nalunye ezinweleni zekhanda lenu. ₁₉Ekubekezeleni kwenu, niyakuzuza ukuphila kwenu.”

₂₀“Kuyakuthi nxa nibona iJerusalema lihaqwe yizimpi, bese nazi-ke ukuthi sekusondele ukubhujiswa kwalo. ₂₁Ngakho-ke labo abaseJudiya mababalekele ezintabeni; abakulo, mabaphume baphele; abasemasimini, abangangeni kulo. ₂₂Ngokuba lezi kuyakube kuyizinsuku zempindiselo ukuze kugcwaliseke konke okulotshiweyo. ₂₃Wo, kwabakhulelweyo nakwabancelisayo ngalezo zinsuku! Ngokuba kuyakuba khona ukuhlupheka okukhulu emhlabeni, nentukuthelo yehlele phezu kwalesi sizwe. ₂₄Abanye bayakubulawa ngenkemba, abanye bathunjwe, bayiswe ezizweni zonke. IJerusalema liyakunyathelwa phansi ngabezizwe, kuze kuphele isikhathi sabezizwe.”

₂₅“Kuyakuba khona izibonakaliso elangeni, enyangeni, nasezinkanyezini. Izizwe emhlabeni zehlelwe usizi nokudideka ngenxa yokuhlokoma kolwandle nokudlanga kwamaza alo. ₂₆Abantu bayakuquleka ngenxa yokwesaba nangokulindela lokho okuyakwehlela umhlaba, ngokuba amandla ezulu ayakunyakaziswa. ₂₇Khona-ke bayakuyibona iNdodana yomuntu iza ngefu, inamandla nenkazimulo enkulu. ₂₈Kepha uma sekuqala ukwenzeka lokho, sukumani nime, niphakamise amakhanda enu, ngokuba ukuhlengwa kwenu sekusondele.”

₂₉Wabatshela umzekeliso, wathi: “Ake nibheke umkhiwane nezihlahla zonke. ₃₀Kuthi uma kuhluma amacembe, nibone, futhi nazi ukuthi sekuthwasa ihlobo. ₃₁Kanjalo nani, nxa nibona konke lokhu kwenzeka, yazini ukuthi umbuso kaNkulunkulu ususeduze.

₃₂“Ngiqinisile ngithi kini: lesi sizukulwane asiyukwedlula kungakenzeki konke lokho. ₃₃Kuyakudlula izulu nomhlaba, kepha amazwi ami awasoze adlula.

₃₄“Qaphelani, funa izinhliziyo zenu zisindwe ukuminza, ukudakwa, neminako yalokhu kuphila, bese lolo lusuku lunizume, ₃₅ngokuba luyakufika njengogibe kubo bonke abantu abasebusweni bomhlaba wonke. ₃₆Ngakho-ke lindani, nikhuleke ngezikhathi zonke ukuze nikwazi ukuphunyuka kukho konke lokhu okuzakukwenzeka, nokuba nime phambi kweNdodana yomuntu.”

₃₇Ngalezo zinsuku uJesu wayefundisa ethempelini emini, bese kuthi ebusuku ahambe ayolala entabeni okuthiwa eYeminqumo. ₃₈Bonke abantu babevuka ekuseni ngovivi baye ethempelini, ukuba bamlalele.