NgokukaLuka 10

₁Sekwedlule konke lokho, iNkosi yakhetha abanye abangama-70, yabathumela ngababili ukuba bayandulele, baye emizini nasezindaweni zonke ezakuya kuzo. ₂Yathi kubo: “Isivuno sikhulu, kepha ziyingcosana izisebenzi, ngakho-ke nxusani ukuba inkosi yokuvuna ithumele izisebenzi esivunweni sayo. ₃Nina hambani, ngiyanithuma; ninjengamawundlu phakathi kwezimpisi. ₄Ningaphathi sikhwama samali, nasikhwama sokuthekela, nazicathulo, futhi ningabingeleli muntu endleleni.

₅“Noma iyiphi indlu eningenisa kuyo, niyakuqala nithi: ‘Ukuthula makube kule ndlu.’ ₆Uma kukhona lapho umuntu wokuthula, ukuthula kwenu kuyakuhlala phezu kwakhe, kepha uma kungenjalo, kuyakubuyela kini. ₇Hlalani kuleyo ndlu, nidle, niphuze abanipha khona, ngokuba isisebenzi siyifanele inkokhelo yaso. Ningaphumi ningena izindlu ngezindlu.

₈“Noma yimuphi umuzi eningena kuwo, banamukele, yidlani lokho abakubeka phambi kwenu, ₉baphiliseni abagulayo abakuwo, nithi kubo: ‘Umbuso kaNkulunkulu ususondele kini.’ ₁₀Noma yimuphi umuzi eningena kuwo, banganamukeli, phumelani emigwaqweni yawo, nithi: ₁₁‘Ngisho uthuli lomuzi wakini olunamathele ezinyaweni zethu, siluthintithela kini, nokho yazini lokhu ukuthi umbuso kaNkulunkulu ususondele.’ ₁₂Ngithi kini: kuyakuba ngcono kwabaseSodoma ngalolo lusuku kunakulowo muzi ngomhla wokwehlulela.”

₁₃“Maye, kuwe Khorazini! Maye, kuwe Bhethsayida! Ngokuba ukuba le misebenzi yamandla eyenziwe kini beyenziwe eThire naseSidoni, ngabe kade baphenduka, bembatha eyamasaka, bazihuqa ngomlotha. ₁₄Kepha kuyakuba ngcono eThire naseSidoni ngosuku lokwehlulelwa kunakini. ₁₅Nawe Khaphernawume uthi kambe uyakuphakanyiselwa ezulwini na? Phinde, uyakwehliselwa eHayidesi.

₁₆“Onizwayo nina, uyangizwa Mina; onganemukeli nina, akangamukeli Mina; ongangemukeli Mina, akamemukeli ongithumileyo.”

₁₇Abangama-70 babuya bejabulile, bethi: “Nkosi, ngisho namadimoni ayasithobela ngegama lakho.”

₁₈Kepha wathi kubo: “Ngabona uSathane ewa ezulwini njengonyazi. ₁₉Niyabona, ngininike igunya lokunyathela izinyoka nawofezela, naphezu kwamandla wonke esitha; akukho lutho oluyakunilimaza. ₂₀Nokho ningathokozi ngalokhu ukuthi imimoya iyanithobela, kodwa jabulelani ukuthi amagama enu alotshiwe ezulwini.”

₂₁Ngaleso sikhathi uJesu wathokoza kuMoya oNgcwele, wathi: “Ngiyakubonga, Baba, Nkosi yezulu nomhlaba, ngokuba ukufihlile lokhu kwabahlakaniphileyo nabanokuqonda, wakwembulela izingane; yebo, Baba, ngokuba kwaba kuhle phambi kwakho ukuba kube kanjalo. ₂₂Konke kunikelwe kimi nguBaba; akekho owaziyo ukuthi iNdodana ingubani, kuphela uYise, nokuthi uYise ungubani, kuphela iNdodana, nalowo iNdodana ethanda ukumembulela yena.”

₂₃Wayesephendukela kubafundi bakhe, wakhuluma nabo bebodwa, wathi: “Abusisiwe amehlo abona enikubonayo. ₂₄Ngokuba ngithi kini: baningi abaphrofethi namakhosi ababefisa ukubona enikubonayo, kodwa abakubonanga; nokuzwa enikuzwayo, kepha abakuzwanga.”

₂₅Kwase kusukuma isazimthetho esithile, samlinga sathi: “Mfundisi, ngizakwenzani ukuba ngidle ifa lokuphila okuphakade na?”

₂₆Wathi kuso: “Kulotshweni emthethweni na? Uwufunda kanjani na?”

₂₇Saphendula sathi: “Woyithanda iNkosi uNkulunkulu wakho ngayo yonke inhliziyo yakho, nangawo wonke umphefumulo wakho, nangawo wonke amandla akho, nangayo yonke ingqondo yakho; umthande nomakhelwane wakho njengalokhu uzithanda wena.”

₂₈Wayesethi kuso: “Uphendule kahle; yenza lokho, uzakuphila.”

₂₉Kepha sona sithanda ukuzithetha, sathi kuJesu: “Umakhelwane wami ngubani na?”

₃₀UJesu wathatha wathi: “Umuntu othile wehla eJerusalema eya eJerikho; wazithela phezu kwezigcwelegcwele, zamhlubula izingubo, zamshaya, zahamba, zimshiya sekusele umndondo nje. ₃₁Kwathi kungalindelekile, kwehla umphristi othile ngaleyo ndlela; kuthe lapho embona, wachezuka endleleni. ₃₂Kanjalo nomLevi; kwathi uma efika kuleyo ndawo embona, wamgwema wedlula. ₃₃Kepha umSamariya othile owayesendleleni, wazithela kuye; kuthe embona, wamhawukela; ₃₄waya kuye, wambopha amanxeba, wathela amafutha newayini kuwo, wamgibelisa esilwaneni sakhe, wamusa endlini yezihambi, wamnakekela. ₃₅Ngakusasa wakhipha odenariyu ababili, wabanika umninindlu yezihambi, wathi kuye: ‘Mnakekele, zonke izindleko ezenzekayo ngaphezu kwalokhu, ngiyakukukhokhela zona uma sengibuya.’

₃₆“Ngumuphi kulaba abathathu owaba ngumakhelwane walo owazithela phezu kwezigcwelegcwele na?”

₃₇Sathi: “Yilowo owamhawukelayo.”

Wayesethi uJesu kuso: “Hamba wenze kanjalo nawe.”

₃₈Besahamba, wangena emzaneni othile; owesifazane mumbe, ogama lakhe nguMartha, wamemukela endlini. ₃₉Wayenodadewabo okuthiwa nguMariya, owahlala ngasezinyaweni zeNkosi, walalela izwi layo. ₄₀Kepha uMartha wayematasatasa, enza imisebenzi eminingi; waya kuJesu, wathi: “Nkosi, akukukhathazi yini ukuthi udadewethu ungishiyile, ngisebenza ngedwa na? Ngakho-ke mtshele angisize.”

₄₁Kepha iNkosi yamphendula, yathi: “Martha, Martha, ukhathazekile futhi uphazanyiswa yizinto eziningi. ₄₂Kepha kunye okudingekileyo; uMariya ukhethe okuyikhona kungcono, angayukwephucwa khona.”