ISililo 5

₁Khumbula Simakade, okusehleleyo!

Bheka, ubone ihlazo lethu!

₂Ifa lethu seliphendulwe laba ngelabafokazi,

izindlu zethu zaba ngezabezizwe.

₃Siyizintandane, asinababa,

omama bethu sebefana nabafelokazi.

₄Amanzi ethu siwaphuza ngemali,

izinkuni zethu sesizithola ngokuzithenga.

₅Abasixoshayo basihleli entanyeni,

sikhathele, asikutholi ukuphumula.

₆Sizinikele kwabaseGibhithe nakwabase-Asiriya,

ukuze sithole isinkwa, sisuthe.

₇Okhokho bethu benza okubi,

manje abasekho,

kodwa sekuyithi esesithweswe ububi babo.

₈Sesibuswa yizigqila;

akekho ongasikhulula esandleni sazo.

₉Uma sifuna ukuthola ukudla,

sibeka impilo yethu engcupheni

yokudliwa yinkemba ogwadule.

₁₀Isikhumba sethu sishisisa okweziko

ngenxa yokubhuqwabhuqwa yindlala.

₁₁Badlwengula abesifazane eZiyoni,

nezintombi emizini yakwaJuda.

₁₂Izikhulu ziphanyekwa ngezandla zazo;

abahlonishwa nabadala.

₁₃Izinsizwa zithwaliswa amatshe okusila.

Abafana babhamazeliswa yimithwalo yezinkuni.

₁₄Akusahlali zingwevu esangweni,

nezinsizwa azisayivumi ingoma yazo.

₁₅Iphelile intokozo yenhliziyo yethu,

ukusina kwethu sekuphenduke ukulila.

₁₆Umqhele uwile ekhanda lethu.

Maye, kithi, ngokuba sonile!

₁₇Ngalokho-ke inhliziyo yethu idangele;

ngenxa yalezo zinto,

amehlo ethu afiphele.

₁₈Phezu kwentaba iZiyoni esiyincithakalo,

sekuzulazula amanketshane.

₁₉Wena Simakade, umi ingunaphakade,

isihlalo sakho sobukhosi

siyoba khona izizukulwane ngezizukulwane.

₂₀Usikhohlweleni isikhathi eside kangaka na?

Usilahleleni izinsuku eziningi kangaka na?

₂₁Sibuyisele kuwe, Simakade, siyakubuya;

yenza izinsuku zethu zibe zintsha njengasemandulo;

₂₂ngaphandle uma ususilahle unomphelo,

wasithukuthelela kakhulu.