ISililo 4

₁Hawu, laze lafiphala igolide,

igolide elihle seligqwalile!

Amatshe endlu engcwele,

asesakazeke kuwo wonke amakhona emigwaqo.

₂Amadodana aseZiyoni akhethekileyo

ayefana negolide elicolekileyo,

kodwa manje asefana nezitsha zebumba,

ezingumsebenzi wezandla zombumbi!

₃Ngisho nezimpungushe ziyawancelisa amazinyane azo,

kodwa abesifazane babantu bami,

ababanaki abantwana babo,

banonya njengezintshe zasendle.

₄Ulimi lomntwana oncelayo

lunamathela olwangeni ngenxa yokoma.

Izingane zicela isinkwa,

kodwa akekho ozihlephulelayo.

₅Labo abebekade bedla okumnandi,

sebeyimizulane emigwaqweni.

Labo ababekhuliswe ngokububende,

manje sebelala ezaleni.

₆Ukona kwendodakazi yabantu bami,

kungaphezu kwesono seSodoma

elachithwa ngokuphazima kweso,

kungengazandla zamuntu.

₇Amanaziri akithi ayemhlophe kunongqoqwane,

emhlophe ukwedlula ubisi.

Imizimba yawo yondlekile,

isimo sawo sikhazimula njengesafire.

₈Manje asemnyama ukwedlula ilahle,

ngeke usawakhomba ngisho emigwaqweni.

Isikhumba sawo sesishwabene

sanamathela emathanjeni awo,

sesome safana nokhuni.

₉Bangcono abafe ngenkemba

kunalabo ababulewe yindlala,

babhuqwabhuqwa yinkemane,

ngenxa yokweswela ukudla

okuvela emasimini.

₁₀Ngesikhathi sokuvinjezelwa

nokuchithwa kwabantu bami,

izandla zabesifazane ababekade benozwelo,

zapheka izingane zabo,

zaba ngukudla.

₁₁USimakade uyikhombise ngokugcwele

intukuthelo yakhe;

wathulula ukuvutha kolaka lwakhe,

wathungela umlilo eZiyoni,

oqothule izisekelo zalo.

₁₂Amakhosi omhlaba,

nazo zonke izakhamuzi zawo,

azikholwanga ngukuthi

izitha nabamelene neJerusalema

babengangena emasangweni alo.

₁₃Lokho kwenzeka ngenxa yezono zabaphrofethi,

nobubi babaphristi bakhona,

ababechitha igazi labalungile kulo.

₁₄Babephuphutheka, bezulazula emigwaqweni,

bengcoliswe yigazi

ngangokuthi akekho owayengathinta izingubo zabo.

₁₅Abantu babebahebeza, bethi:

“Sukani lapha, ningcolile!

Sukani, sukani, ningasithinti!”

Ngakho-ke baphenduka abafokazi nemizulane;

abantu phakathi kwezizwe bathi:

“Anisoze nagogobala lapha!”

₁₆NguSimakade luqobo obahlakazile, akasayukubanakekela.

Ababahloniphanga abaphristi,

ababanga namusa kubanumzane.

₁₇Amehlo ethu aze akhathala,

silokhu silindele usizo oluyize,

simi emibhoshongweni yethu,

silinde isizwe esingenakusisindisa.

₁₈Izitha zethu zasizingela

nomaphi lapho sibalekela khona,

sasingasakwazi ukuhamba emigwaqweni yakithi.

Isiphetho sethu sase sisondele,

nezinsuku zethu sezibaliwe,

nokuphela kwethu kwase kufikile.

₁₉Abasixoshayo babenejubane

ukwedlula izinkozi zezulu;

besixosha naphezu kwezintaba,

besilalele unyendle ehlane.

₂₀Ogcotshiweyo kaSimakade,

ongukuphila nomphefumulo wethu,

wakhalakathela emigodini yabo,

esathi ngaye:

“Uyoba ngumthunzi wethu

wokukhosela phakathi kwezizwe.”

₂₁Jabula, uthokoze wena ndodakazi, yakwa-Edomi,

wena ohlala e-Uzi,

kodwa le ndebe izokwedlulela nakuwe,

uzodakwa, uzihlubule, ube nqunu.

₂₂Isigwebo sakho

nesikhathi sokuthunjwa kwakho

sekuphelile, ndodakazi, yaseZiyoni.

Kodwa wena, ndodakazi, yakwa-Edomi, uzojeziswa,

Yena uzozambula izono zakho,

ngenxa yobubi bakho.