UJoshuwa 13

₁UJoshuwa wayesemdala, eseneminyaka eminingi; uSimakade wathi kuye: “Usukhulile, neminyaka yakho isihambile, liseliningi izwe okusafanele ukuba lidliwe.

₂“Nanti izwe elisasele: zonke izifunda zamaFilisti nalezo zamaGeshuri, ₃kusuka eShihori elisempumalanga yeGibhithe kuya enyakatho emngceleni we-Ekhroni, elaziwa ngokuthi yiKhanani; kunababusi abayisihlanu bamaFilisti, abaseGaza, e-Ashidodi, e-Ashikeloni, e-Githi, nase-Ekhroni, nalabo base-Avimu ngasenyakatho, ₄lonke izwe lamaKhanani, neMehara yamaSidoni kuye kufike e-Afekhi nasemngceleni wama-Amori, ₅nezwe lamaGebhali nalo lonke iLebhanoni kuya empumalanga, kusuka eBhali Gadi phansi kwentaba iHermoni kuya eLebo Hamathi, ₆zonke izakhamuzi zakwelezintaba, kusuka eLebhanoni kuya eMishirefothi Mayimi, nawo wonke amaSidoni. Mina luqobo ngizobaxosha phambi kuka-Israyeli; izwe ngilabele u-Israyeli kuphela, libe yifa lakhe njengalokhu ngikuyalile. ₇Ngalokho-ke lehlukanise leli lizwe libe yifa lezizwana eziyisishiyagalolunye nengxenye yesizwana sakwaManase.”

₈Enye ingxenye yesizwana sakwaManase, nabakwaRubeni nabakwaGadi basemukela isabelo sefa labo abasinikwa nguMose ngaphesheya kweJordani ngasempumalanga, njengalokhu uMose, inceku kaSimakade, yababela lona: ₉kusuka e-Aroweri elingasekupheleni kwesigodi i-Arinoni, nemizi ephakathi nesigodi, nethafa kusuka eMedeba kuya eDibhoni; ₁₀nayo yonke imizi yenkosi uSihoni wama-Amori owayebusa eHeshiboni, kuze kuyofika emngceleni wama-Amoni, ₁₁neGileyadi nesifunda samaGeshuri, namaMahakhathi, nayo yonke intaba iHermoni, nalo lonke iBhashani kuya eSalekha, ₁₂wonke umbuso ka-Ogi eBhashani, owayebusa e-Ashitharothi nase-Edreyi; nguyena kuphela owayesasele kumaRefa; bonke laba uMose wabanqoba, wabaxosha. ₁₃Nokho u-Israyeli akazange awaxoshe amaGeshuri namaMahakhathi, kodwa amaGeshuri namaMahakhathi ahlala phakathi kwabakwa-Israyeli kuze kube yinamuhla.

₁₄Yisizwana sakwaLevi kuphela uMose angasabelanga ifa, ngoba iminikelo yomlilo eya kuSimakade uNkulunkulu ka-Israyeli yiyo eyifa labo njengoba asho kubo.

₁₅UMose wanika isizwana sakwaRubeni ifa laso ngokwezindlu zaso.

₁₆Indawo yabo yayisuka e-Aroweri ngasekupheleni kwesigodi i-Arinoni, nemizi ephakathi nesigodi, nawo wonke amathafa ngaseMedeba, ₁₇neHeshibhoni, nayo yonke imizi yalo esethafeni; iDibhoni, iBhamothi Bhali, iBhethi Bhali Mehoni, ₁₈iJahazi, iKhedemothi, iMefahathi, ₁₉iKiriyathayimi, iSibhima, iZerethi Shahari egqumeni lesigodi, ₂₀iBhethi Pheyori, imithambeka iPhisiga, neBhethi Jeshimothi, ₂₁okungukuthi yonke imizi esethafeni, nawo wonke umbuso kaShihoni inkosi yama-Amori, owayebusa eHeshibhoni, owanqotshwa nguMose nababusi bakwaMidiyani: u-Evi, uRekhemi, uZuri, uHure noRebha izikhulu zikaShihoni ezazakhe kulelo lizwe. ₂₂Phakathi kwalabo u-Israyeli ababulala ngenkemba kwakungoBhileyamu, indodana kaBheyori owayengumbhuli. ₂₃Umngcele wabakwaRubeni kwakuyiJordani nosebe lwalo. Leli kwakuyifa lozalo lukaRubeni ngokwemindeni yabo, imizi nemizana yabo.

₂₄UMose wanika isizwana sakwaGadi ifa, ngokwemindeni yaso: ₂₅indawo yabo kwawuyiJazeri, nayo yonke imizi yakwaGileyadi, nengxenye yezwe lakwa-Amoni kuya e-Aroweri, elingaphambi kweRaba, ₂₆kubuye kusuke eHeshibhoni kuye eRamathi Mizpha neBhethonimi, kusuke eMahanayimi kuya esifundeni saseDebhiri, ₂₇nesigodi saseBhethi Haramu, iBhethi Nimra, iSukhothi neZafoni, nawo wonke umbuso wenkosi uSihoni waseHeshibhoni, iJordani nosebe lwayo, kuze kuyofika ezansi nolwandle iKhinerethi, empumalanga ngaphesheya kweJordani. ₂₈Leli kwakuyifa lozalo lukaGadi ngokwemindeni yabo, imizi nezifunda zabo.

₂₉UMose wanika ingxenye yesizwana sakwaManase ifa laso; labelwa abozalo lukaManase ngokwemindeni yabo.

₃₀Indawo yabo yayisuka eMahanayimi, idabule kulona lonke iBhashani, wonke umbuso wenkosi u-Ogi waseBhashani, nemizi yonke eJayiri, eyayiseBhashani, okuyimizi engama-60, ₃₁nengxenye kwaGileyadi, i-Ashitharothi, ne-Edireyi, imizi yasembusweni ka-Ogi eBhashani; yonke leyo yabelwa abozalo lukaMakhiri, indodana kaManase ngokwemindeni yabo, ingxenye yabozalo lukaMakhiri.

₃₂Leli yifa uMose alaba emathafeni akwaMowabi ngaphesheya kweJordani, empumalanga neJerikho. ₃₃Kepha kwabesizwana sakwaLevi, uMose akabanikanga sabelo esiyifa labo; uSimakade uNkulunkulu ka-Israyeli uyisabelo sabo, njengoba ayeshilo kubo.