UJoweli 2

₁Bethani uphondo eZiyoni,

nihlabe umkhosi entabeni yami engcwele,

mazithuthumele zonke izakhamuzi ezweni,

ngokuba luyeza usuku lukaSimakade,

impela selusondele.

₂Usuku lobumnyama nesigayegaye,

usuku lwamafu nobumnyama obukhulu,

njengentathakusa yendlaleka ezintabeni,

kunjalo nokuza kwezinkumbi zabantu abanamandla

abangakaze babekhona kwasemandulo,

nabangasoze babakhona abanjalo emva kwabo

kuze kube yiminyaka

yezizukulwane ngezizukulwane.

₃Phambi kwabo kuqothula umlilo,

emva kwabo kuvutha ilangabi;

izwe eliphambi kwabo

linjengensimu e-Edeni,

kodwa emva kwabo liyihlane elingenalutho,

akukho okuphunyukayo kubo.

₄Ukubukeka kwabo kufana nesimo samahhashi,

bagijima njengabagibele amahhashi empi.

₅Bagqabashiya kube sengathi

ngumsindo wezinqola ezicongweni zezintaba,

nanjengomsindo welangabi lomlilo

ongqongqisa amahlanga,

banjengabantu abanamandla abavivela ukulwa.

₆Phambi kwabo izizwe ziyathuthumela,

ubuso bonke buphaphatheke.

₇Bagijima njengamaqhawe,

njengamabutho empi ekhuphuka ongangeni.

Bayahamba, kube yilowo nalowo

ngendlela yakhe,

abaphambuki endleleni yabo.

₈Abakhubani omunye nomunye;

bayahamba,

kube yilowo nalowo endleni yakhe;

abayeki ukungena ngodli phakathi kwezikhali.

₉Batheleka emzini,

bagijime ogangeni;

bakhuphukele ezindlini,

bangulukudele ngamafasitela njengesela.

₁₀Umhlaba uyazamazama phambi kwabo,

isibhakabhaka sithuthumele phambi kwabo.

Ilanga nenyanga kuyakubamnyama bhuqe,

nezinkanyezi zigodle ukukhanya kwazo.

₁₁USimakade ulikhiphile izwi lakhe

phambi kwempi yakhe,

ngokuba amabutho akhe maningi kakhulu,

impela owenza izwi lakhe unamandla.

Nokho usuku lukaSimakade lukhulu,

futhi luyesabeka ngokwedlulele.

Pho ngubani ongalumela na?

₁₂USimakade uyakhuluma uthi:

“Ngisho namanje buyelani kimi

ngenhliziyo yenu nonke,

ngokuzila ukudla, ngokukhala, nangokulila.”

₁₃Dabulani izinhliziyo zenu,

hhayi izingubo zenu,

nibuyele kuSimakade uNkulunkulu wenu,

ngokuba unomusa nesihawu,

uyephuza ukuthukuthela,

unesihe nothando olungenamkhawulo,

uyaxolela angabe esajezisa.

₁₄Ngubani owaziyo uma engabuya axolele,

ashiye isibusiso emva kwakhe,

kube ngumnikelo wokusanhlamvu nowokuphuzwayo

kuSimakade uNkulunkulu wenu na?

₁₅Bethani uphondo eZiyoni,

nimemezele usuku olungcwele lokuzila ukudla,

nibize umhlangano.

₁₆Qoqani abantu, ningcwelise umhlangano,

niqoqe amalunga,

izingane nezinsana ezisancela.

Umyeni makaphume ekamelweni lakhe

nomlobokazi emgonqweni wakhe.

₁₇Abaphristi, izikhonzi zikaSimakade,

mabakhale phakathi kompheme ne-althare, bathi:

“Hawukela abantu bakho, Simakade,

ungalenzi ifa lakho libe yinto

yokuthukwa nenhlekisa,

kungani kufanele bathi

phakathi kwabezizwe:

‘Uphi uNkulunkulu wabo na?’ ”

₁₈USimakade walihawukela izwe lakhe,

waba nesihe kubantu bakhe.

₁₉USimakade waphendula wathi kubantu bakhe:

“Bhekani-ke, ngiyakunithumelela okusanhlamvu,

iwayini elisha namafutha amasha,

niyakusutha ngakho,

ngingabe ngisanenza inhlekisa ezizweni.

₂₀Ngiyakuyidudulela kude nani

impi yasenyakatho,

ngiyixoshele ezweni eligagadekile neliyincithakalo,

ubuso bayo bubheke

ngasolwandle empumalanga,

ingemuva layo lifulathele

ngasolwandle entshonalanga,

ukunuka kwayo kukhuphuke,

kwenyuke nephunga layo elibi,

ngokuba wenze izinto ezinkulu.

₂₁“Lizwe, ungesabi;

jabula uthokoze,

ngokuba uSimakade wenzile izinto ezinkulu.

₂₂Zilwane zasendle, ningesabi,

ngokuba amadlelo ehlane aluhlaza,

impela nezihlahla zithela izithelo,

umkhiwane nomvini kuthele kakhulu.

₂₃Jabulani, bantu baseZiyoni,

nithokoze kuSimakade uNkulunkulu wenu,

ngokuba unipha imvula

yokuqala ngokulunga,

uninisele imvula yokuqala

neyakamuva ngenyanga yokuqala.

₂₄Izibuya ziyakugcwala okusanhlamvu,

izikhamo ziphuphume iwayini

elisha namafutha amasha.

₂₅“Ngiyakunibuyisela iminyaka okwadla ngayo isikhonyane,

amaqhwagi, isibotho nenkasa,

impi yami enkulu engayithumela kini.

₂₆Impela niyakudla nisuthe,

nilidumise igama likaSimakade uNkulunkulu wenu

onenzele okumangalisayo;

abantu bami abayukujabha ingunaphakade.

₂₇Niyakukwazi ukuthi ngiphakathi kuka-Israyeli,

nokuthi Mina nginguSimakade uNkulunkulu wenu,

akekho omunye;

abantu bami abayukujabha

kuze kube phakade.

₂₈“Kuyakuthi kamuva ngithululele uMoya wami

phezu kwabo bonke abantu.

Amadodana namadodakazi enu ayakuphrofetha,

abadala benu baphuphe amaphupho,

izinsizwa zenu zibone imibono.

₂₉Ngalezo zinsuku ngiyakuthululela uMoya wami

naphezu kwezinceku nezincekukazi.

₃₀Ngiyakuveza izimangaliso ezulwini nasemhlabeni,

igazi, umlilo nezikhatha zentuthu.

₃₁Ilanga liyakuphenduka ubumnyama,

inyanga ibe yigazi,

lungakafiki usuku olukhulu

nolwesabekayo lukaSimakade.

₃₂Kepha kuyakuthi bonke

ababiza igama likaSimakade baphunyuke,

ngokuba entabeni iZiyoni naseJerusalema

kuyakuba khona abasindileyo

njengoba eshilo uSimakade,

labo abayakubizwa nguSimakade.”