UJobe 8

₂“Kuyoze kube nini ukhuluma lezi zinto,

amazwi akho abe ngumoya

onamandla, na?

₃Ngabe uNkulunkulu uyabuhlanekezela ubulungiswa,

uSomandla aphendukezele ukulunga na?

₄Uma abantwana bakho bonile kuye,

wabanikela emandleni eziphambeko zabo.

₅Kuyothi lapho umfuna uNkulunkulu,

umnxusa uSomandla,

₆uma uhlambulukile, uqotho,

Yena uyokubheka,

akubuyisele endaweni yakho efaneleyo.

₇Nakuba ukuqala kwakho kwakungokuncane,

nokho ikusasa lakho liyokhula kakhulu.

₈Ake ubuze manje ngezizukulwane ezakwandulelayo,

uqaphele okwatholwa ngokhokho bazo,

₉ngoba thina singabayizolo nje, asinalwazi;

izinsuku zethu emhlabeni ziyithunzi.

₁₀Bona abayukukufundisa yini, bakutshele,

bakhiphe amazwi ezinhliziyweni zabo na?

₁₁Umhlanga ungahluma yini

lapho kungenaxhaphozi khona na?

Ibhuma lingamila yini

kungekho amanzi na?

₁₂Uma liseluhlaza, lingakakhiwa,

liyabuna phambi kwabo bonke utshani.

₁₃“Zinjalo-ke izindlela zabo bonke

abakhohlwa nguNkulunkulu,

ithemba longenabunkulunkulu liyakushabalala.

₁₄Ithemba lakhe liyakunqunywa,

nesisekelo sakhe siyindlu yolwembu.

₁₅Uyakwencika endlini yakhe,

kepha ayiyukuma;

uma ebambelela kuyo, ayiyukuqina.

₁₆Yena uluhlaza phambi kwelanga;

imixhantela yakhe iyenaba ensimini yakhe.

₁₇Izimpande zakhe ziyathandela enqwabeni yamatshe,

zikhule phakathi kwamatshe.

₁₈Uma ebhujiswa endaweni yakhe,

iyakumphika ithi:

‘Angikaze ngikubone.’

₁₉Bheka, lokho kuyindlela yakhe yokuthokoza.

Kusazovela omunye othulini.

₂₀“Phela uNkulunkulu akayukumlahla ongenasici,

akayukuzibamba izandla zabenza okubi,

₂₁aze agcwalise umlomo wakho ngokuhleka,

nezindebe zakho ngenhlokomo yokwethaba.

₂₂Abakuzondayo bayothelwa ngehlazo;

ithende lezikhohlakali alisayukuba bikho.”