UJobe 28

₁“Impela ikhona imayini yesiliva,

nendawo okucwengwa kuyo igolide.

₂Insimbi imbiwa emhlabathini,

netshe lincibilikiswe libe yithusi.

₃Abavukuzi bayabuqeda ubumnyama,

bacingisise amatshe emajukujukwini

nasesigayegayeni sobumnyama.

₄Bamba umgodi wemayini

kude nalapho kuhlala khona abantu,

lapho lungakaze lubhadwe muntu khona,

behla bejikajika belenga kude nabantu.

₅Emhlabeni kuvela ukudla,

kodwa phansi kwawo

uyaphendulwa njengomlilo.

₆Amatshe awo ayindawo yamasafire;

inothuli lwegolide.

₇Leyo ndlela ayaziwa yinqe,

neso likaheshane alikaze liyibone.

₈Izilo ezinkulu azikaze zihambe ngayo,

nebhubesi alikaze ledlule kuyo.

₉Welula isandla sakhe

phezu kwetshe lensengetsha,

agumbuqele izintaba,

kusukela ezimpandeni zazo.

₁₀Uqhekeza imihohoba emadwaleni;

iso lakhe likubona konke okuyigugu.

₁₁Uvimba imifula ingaconsi,

akukhiphele ekukhanyeni okufihlakeleyo.

₁₂“Kepha kutholakalaphi ukuhlakanipha na?

Ikuphi indawo yokuqonda na?

₁₃Umuntu akayazi intengo yakho,

akutholakali ezweni labaphilayo.

₁₄Utwa luthi:

‘Akukho kimi;’

ulwandle luthi:

‘Akukho kimi.’

₁₅Akunakuzuzwa ngegolide,

intengo yakho ayinakulinganiswa nesiliva.

₁₆Ayinakulinganiswa negolide lase-Ofiri,

neshohamu eliyigugu nesafire.

₁₇Igolide nengilazi akunakulinganiswa nakho,

akunakushintshaniswa ngezinto zegolide elicwengekileyo.

₁₈Akunakukhulunywa ngekhorali nangekhristalu,

intengo yobuhlakani ingaphezu kweyamarubhi.

₁₉Ithophazi laseKhushe alinakuqhathaniswa nakho,

kungelingane negolide elicwengekileyo.

₂₀“Kuvela kuphi ukuhlakanipha na?

indawo yokuqonda ikuphi na?

₂₁Kusithekile emehlweni abo bonke abaphilayo,

kufihliwe nasezinyonini zezulu.

₂₂Ukubhubha nokufa,

kuthi: ‘Nathi ngezindlebe zethu

sizwile amahemuhemu akho.’

₂₃UNkulunkulu uyayiqonda indlela yakho,

uyayazi indawo yakho.

₂₄Ngokuba nguye owabeka imikhawulo yomhlaba,

ubona konke okuphansi kwezulu.

₂₅Ngesikhathi enika umoya isisindo sawo,

elinganisa amanzi ngezilinganiso zawo,

₂₆lapho enzela imvula isimiso,

nonyazi lwezulu indlela,

₂₇khona wakubona,

walanda ngakho,

wakuhlela, wakuphenya.

₂₈Wathi kubantu:

‘Bhekani, ukwesaba iNkosi

kungukuhlakanipha;

ukusuka enkohlakalweni kungukuqonda.’ ”