UJobe 27

₂“Ngifunga ngiyagomela,

uNkulunkulu ongephuce ubulungiswa bami,

noSomandla owenze waba muncu

umphefumulo wami;

₃inqobo nje uma ngisaphefumula,

nomoya kaNkulunkulu usesemakhaleni ami,

₄izindebe zami aziyukuyikhuluma inkohlakalo,

nolimi lwami aluyukuyikhipha inkohliso.

₅Makube kude nami

ukuba nginivumele ukuthi nilungile,

angiyukusuka ebuqothweni bami, ngize ngife.

₆Ngibambelele ekulungeni kwami,

angisoze ngakuyeka,

inhliziyo yami ayizenyezi

nangolulodwa lwemihla yami.

₇“Isitha sami masifane nesikhohlakali,

nomelene nami abe njengowenza okubi.

₈Liyini ithemba longenankulunkulu

nxa enqunywa,

lapho uNkulunkulu ethatha umphefumulo wakhe na?

₉UNkulunkulu uyakuzwa yini ukukhala kwakhe,

lapho ehlelwa wusizi na?

₁₀Uyakuthokoza yini ngoSomandla,

ambize uNkulunkulu ngezikhathi zonke na?

₁₁“Ngizakunifundisa ngesandla sikaNkulunkulu;

okukuSomandla angiyukukufihla.

₁₂Bhekani, nina nonke nikubonile,

kungani senenza okuyize na?

₁₃“Lokhu kuyisabelo somuntu oyisikhohlakali kuNkulunkulu,

nefa lezidlova ezilabelwa nguSomandla.

₁₄Uma abantwana bakhe banda,

bandela inkemba;

nabozalo lwakhe abayukusutha ngukudla.

₁₅Abaseleyo bakhe bayobulawa wubhubhane,

abafelokazi babo bangalili.

₁₆Noma angambondela isiliva njengothuli,

anqwabele izembatho njengodaka,

₁₇uyakukwenza lokho,

kodwa ziyokwembathwa ngolungileyo,

ongenacala ehlukanise isiliva.

₁₈Indlu yakhe uyakhe njengenundu,

njengedlangala elakhiwe ngumlindi.

₁₉Ulala eyisigwili,

kodwa ngeke esakwenza lokho,

uyothi evula amehlo akhe

ube ungasekho umcebo.

₂₀Uvalo luyakumgabha njengesikhukhula,

ebusuku, isishingishane simphephule.

₂₁Umoya wasempumalanga uyakumphephulela phezulu,

umphephule asuke endaweni yakhe.

₂₂Uyakumphephula ungamhawukeli,

athi galo yephuka ebalekela amandla awo.

₂₃Abantu bayoshaya izandla,

bamklibhizele, bamnximfele,

esendaweni yakhe.”