UJobe 24

₁“Kungani ukuba izikhathi zokwehlulela

zingagcinwa nguSomandla,

futhi kungani labo abamaziyo

bengaziboni lezo zinsuku zakhe na?

₂Abantu bagudluza izikhonkwane zemingcele,

baphange imihlambi, bayiklabise.

₃Bathumba imbongolo yentandane,

bathathe inkomo yomfelokazi ibe yisibambiso.

₄Basusa abantulayo emgwaqweni,

bonke abampofu bomhlaba

bayacasha ndawonye.

₅Bheka, njengezimbongolo ehlane,

bayahamba beya emsebenzini wabo,

bedabula ehlane,

befunela abantwana babo ukudla.

₆Bayavuna ifoliji ensimini,

bayakhothoza esivinini sesikhohlakali.

₇Balala nqunu ebusuku bengenangubo,

abanakho okokwembatha emakhazeni.

₈Banethwe yimvula ezintabeni,

babambelela edwaleni

ngoba bengenayo indawo yokuphephela.

₉Intandane ihlwithwa ebeleni,

nengane yompofu ithathwa ibe yisibambiso.

₁₀Bahamba nqunu bengenazembatho,

bathwale izithungo, belambile.

₁₁Bakhama amafutha phakathi kwezingange,

banyathela izikhamo zewayini,

kepha bomile.

₁₂Kusukela emzini kububula abafayo,

amaphimbo abalimele kakhulu ayakhala ecela usizo,

kodwa uNkulunkulu akayinaki imithandazo yabo.

₁₃“Kukhona abamelene nokukhanya,

abangazibandakanyi nezindlela zakho,

abanganamatheli emikhondweni yakho.

₁₄Umbulali uvuka ngovivi,

abulale ompofu nontulayo;

ebusuku ufana nesela.

₁₅Iso lesiphingi lilindela ukuhlwa,

lithi: ‘Akukho liso elisazakungibona,’

bese sizemboza ubuso.

₁₆Ngobumnyama bagqekeza imizi,

emini bazivalele, abakwazi ukukhanya.

₁₇Ngokuba ubumnyama obukhulu

kubo bonke labo bunjengokusa,

lokhu bayakwazi ukwesabeka kwesigayegaye.

₁₈“Banejubane ebusweni bamanzi,

izabelo zabo ziqalekisiwe emhlabeni,

abasayukuphendukela endleleni yezivini.

₁₉Isomiso nokushisa kuyawomisa amanzi eqhwa;

yenza kanjalo-ke nendawo yabafileyo

kulabo abonileyo.

₂₀Isibeletho siyabakhohlwa,

basobozelwe yizimpethu, abasayukukhunjulwa,

ukungalungi kwephulwa njengesihlahla.

₂₁Balimaza oyinyumba,

abakwenzi okuhle kumfelokazi.

₂₂UNkulunkulu uyazandisa izinsuku

zokuphila kwamaqhawe ngamandla akhe,

uyasukuma lapho kungasekho osenethemba lokuphila.

₂₃Umupha ukuvikeleka, ameseke;

amehlo akhe asezindleleni zabo.

₂₄Bayaphakanyiswa okwesikhashana,

babuye bashabalale;

bayabuna, banqunywe njengamazimba.

₂₅“Uma kungenjalo ngubani ongakhombisa

ukuthi ngingumqambimanga,

awenze ize amazwi ami na?”