UJobe 23

₂“Nanamuhla ukukhononda kwami kumunyu;

isandla sami sinzima,

nakuba ngibubula.

₃Sengathi ngabe ngiyazi

ukuthi ngizomthola kuphi,

ukuze ngifike endaweni yakhe.

₄Bengiyakulwethula udaba lwami phambi kwakhe,

umlomo wami ngiwugcwalise ngamazwi empikiswano.

₅Bengiyakuwazi amazwi abeyokungiphendula ngawo,

ngikuqonde abezokusho kimi.

₆Ubeyakuphikisana nami yini

ngamandla akhe amakhulu na?

Qha, ubeyongilalela.

₇Olungileyo ubengaphikisana naye,

mina ngikhululwe kumehluleli wami ingunaphakade.

₈Kepha uma ngiya phambili,

akekho lapho,

uma ngiya emuva, angimboni

₉ngakwesokhohlo, lapho ezifihle khona, angimboni;

ujikela ngakwesokunene,

kepha angimboni.

₁₀“Ngokuba uyayazi indlela yami; esengivivinyile,

ngiyakuphuma nginjengegolide.

₁₁Unyawo lwami lunamathele ezinyathelweni zakhe;

ngiyigcinile indlela yakhe, angiphambukanga.

₁₂Angichezukanga emyalweni wezindebe zakhe;

amazwi akhe ngiwagcinile esifubeni sami.

₁₃“Yena akaguquki,

ngubani ongamguqula na?

Wenza lokhu okufiswa ngumphefumulo wakhe.

₁₄Uyakukufeza lokho angiqokele khona;

nokunye okuningi okusemqondweni wakhe.

₁₅Ngakho-ke ngiyamesaba nxa ngiphambi kwakhe,

uma ngicabanga ngaye ngiba nengebhe ngaye.

₁₆UNkulunkulu uyidangalisile inhliziyo yami.

uSomandla ungethusile,

₁₇Angibhujiswanga phambi kwesigayegaye,

nakuba okumnyama kungisibekele.”