UJeremiya 48

“Maye, kulo iNebho,

ngokuba liyakubhujiswa,

lithelwe ngehlazo,

libanjwe iKiriyathayimi,

ngokuba liyakuthelwa ngehlazo,

izinqaba zalo zibe yimvithi!

₂Udumo lukaMowabi luphelile;

iHeshibhoni bacebe okubi ngalo, bathi:

wozani sisiqede nya lesi sizwe.

Nawe Madimeni uyakuthuliswa;

inkemba iyakukuxosha.

₃Umsindo wokukhala okulusizi uvela eHoranayimi,

incithakalo, incithakalo enkulu.

₄UMowabi ubhujisiwe;

abancane bakhe nezinceku zakhe

bakhala kalusizi.

₅Impela benyukela eLuhithe,

behamba bekhihla isililo,

nalapho sebehlela eHoronayimi,

kuzwakala ukukhala okulusizi,

ngenxa yencithakalo.

₆Balekani, nisindise impilo yenu,

ukuze nibe njengesihlahla esiyize ehlane.

₇Ngokuba ngenxa yokwethembela

emisebenzini nasengcebeni yakho,

nawe uyakubanjwa,

uKhemoshi aye ekuthunjweni;

abaphristi bakhe nezikhulu zakhe, kanyekanye.

₈Umbhubhisi uyakutheleka kuyo yonke imizi,

akuyukuphunyuka muzi;

isigodi siyobhujiswa,

ithafa liqothulwe;

lokho ukushilo uSimakade.

₉Nikani uMowabi amaphiko,

ngokuba uyakundiza,

aphume;

imizi yakhe iyakuba yincithakalo,

kungabi bikho ohlala kuyo.

₁₀“Makaqalekiswe lowo owenza

umsebenzi kaSimakade ngokunganakekeli,

aqalekiswe lowo onganindi inkemba yakhe ngegazi.

₁₁“UMowabi ubephumule kwasebusheni bakhe,

ephumule njengenzika yewayini;

akathululwanga esitsheni, ethululelwa kwesinye;

akayanga ekuthunjweni,

ngakho-ke usanambitheka njengoba enjalo,

nephunga lakhe aliguquki.

₁₂Ngakho-ke bheka, izinsuku ziyeza,” kusho uSimakade,

“engiyakuthumela kuye abagumbuqeli

abayogumbuqela izitsha zakhe,

bathulule izimvaba zakhe,

baziphohloze.

₁₃UMowabi uyakujabha ngoKhemoshi,

njengalokhu indlu ka-Israyeli yajabha ngeBhetheli,

ithemba layo.

₁₄“Ningasho kanjani, nithi:

‘Singamaqhawe namabutho anamandla okulwa na?’

₁₅UMowabi uyakubhujiswa,

nemizi yakhe ihlaselwe;

izinsizwa zakhe zekhethelo zehlele ukuyobulawa,”

kusho iNkosi egama layo nguSimakade Wamabandla.

₁₆“Inhlekelele kaMowabi iseduze,

usizi lwakhe luza ngokushesha okukhulu.

₁₇Nina nonke enimzungezile, mkhaleleni;

nani nonke enazi igama lakhe, yishoni nithi:

‘Yeka ukwaphuka kwenduku enamandla,

udondolo oluhle!’

₁₈“Yehla ebukhosini bakho,

uhlale womile, wena sakhamuzi,

ndodakazi ehlala eDibhoni,

ngokuba umbhubhisi kaMowabi usefikile,

uzobhubhisa izinqaba zakho.

₁₉Yima endleleni, uqaphele wena ohleli e-Aroweri,

buza kobalekayo nakowesifazane ophunyukile, uthi:

‘Kwenzenjani na?’

₂₀UMowabi ujabhisiwe,

uphelelwe ngamandla;

khihlani isililo, nikhale,

nimemezele e-Arinoni

ukuthi uMowabi ubhujisiwe.

₂₁Ukwehlulela kwehlele ezweni eliyithafa:

eHoloni, eJahazi, naseMefahathi;

₂₂eDibhoni, eNebho,

naseBhethi Dibhilathayimi;

₂₃eKiriyathayimi, eBhethi Gamuli, naseBhethi Mehoni;

₂₄eKeriyothe, eBhozira,

nakuyo yonke imizi yakwaMowabi,

ekude neseduze.

₂₅Uphondo lukaMowabi lunqunyiwe,

nengalo yakhe yaphuliwe,” kusho uSimakade.

₂₆“Mdakiseni, ngokuba uzikhukhumezile kuSimakade;

uMowabi makahuquzele ebuhlanzweni bakhe,

abe yinhlekisa futhi.

₂₇U-Israyeli wayengesiyo yini

inhlekisa kuwe na?

Watholakala enamasela yini,

njengoba uma ukhuluma ngaye unikina ikhanda.

₂₈Shiyani imizi,

nihlale phakathi kwamadwala;

nina zakhamuzi zakwaMowabi,

yibani njengejuba,

elakha isidleke emlonyeni wesiwa.

₂₉Sizwile ngokuzidla okukhulu kakhulu, kukaMowabi;

ukuziphakamisa kwakhe,

ukuzithwala kwakhe,

ukuziqhenya kwakhe,

nokuzikhukhumeza kwenhliziyo yakhe.

₃₀Ngiyakwazi ukuzidla kwakhe,” kusho uSimakade

“ukuzikhukhumeza kwakhe kuyize,

nezenzo zakhe azisizi ngalutho.

₃₁Ngakho-ke ngizokhihla isililo ngoMowabi,

ngimkhalele wonke uMowabi,

ngizakububulela abantu baseKhiri Heresi.

₃₂Ngiyakukhalela wena mvini waseSibhina,

ngikukhalela kakhulu kuneJazeri,

ngokuba amagatsha akho alwedlulile ulwandle,

aze afinyelela olwandle eJazeri.

Umbhubhisi uzakuthelekela izithelo zenu

namagilebhisi enu.

₃₃Ukuthokoza nokujabula kususiwe ensimini,

nasezweni lakwaMowabi.

Ngalenza laphela iwayini ezikhamweni;

akusayukunyathelwa ngokujabula,

ukumemeza akuseyikho ukumemeza.

₃₄“EHeshibhoni, e-Elehale naseJahazi kukhalwa kalusizi;

bayezwakalisa izwi labo,

kusukela eZowari kuya eHoronayimi,

kuya e-Egilathi Shelishiya;

ngokuba namanzi aseNimrimi aseshile.

₃₅Ngiyakumqeda nya uMowabi,

lowo onikela ezindaweni eziphakemeyo,

ashisele impepho onkulunkulu bakhe,” kusho uSimakade.

₃₆“Ngakho-ke inhliziyo yami ikhalela uMowabi njengomtshingo,

ibubulela futhi abantu baseKhiri Heresi njengemitshingo,

ngokuba umcebo ababewutholile usushabalele.

₃₇Wonke amakhanda ayizimpandla,

zonke izilevu zigundiwe,

nazo zonke izandla zinqunyiwe;

kukhona indwangu eyisaka okhalo.

₃₈Kukhona isililo phezu kophahla lwakwaMowabi,

nasemashashalazini akhona,

ngokuba uMowabi ngizakumphohloza

njengesitsha esingafunwa muntu,” kusho uSimakade.

₃₉“Yeka ukuphahlazeka kwakhe!

Yeka ukukhala kwabo!

UMowabi ufulathele enamahloni,

usephenduke inhlekisa,

into esabekayo kubo bonke abakhelene naye.”

“Bheka, uyakundiza njengokhozi,

elulele amaphiko akhe kuMowabi.

₄₁Imizi iyakudliwa,

nezinqaba zithathwe.

Ngalolo lusuku, izinhliziyo zamaqhawe akwaMowabi

ziyakuba njengenhliziyo yowesifazane ohelelwayo.

₄₂UMowabi uyobhujiswa,

angabe esaba yisizwe,

ngokuba uzikhukhumezile kuSimakade.

₄₃Ukwesaba, nomgodi nogibe,

kuphezu kwabakhileyo kwaMowabi,” kusho uSimakade.

₄₄“Obalekela ukwesaba,

uyakuwela emgodini;

okhuphuka emgodini,

abanjwe wugibe;

ngokuba ngiyakwehlisela lezi zinto

phezu kwabakwaMowabi,

ngonyaka wokujeziswa kwabo,” kusho uSimakade.

₄₅“Ababalekileyo bayokuma emthunzini waseHeshibhoni, bekhathele,

ngokuba umlilo uyakuqubuka eHeshibhoni,

nelangabi eSihoni,

ungqongqise ibunzi likaMowabi,

nokhakhayi lwabantu abanomsindo.

₄₆Maye kuwe Mowabi!

Abantu bakaKhemoshi bayakubhubha,

ngokuba amadodana akho athunjiwe,

namadodakazi akho, ayiswa ekuthunjweni.

₄₇Kepha ngiyakukuguqula ukuthunjwa kukaMowabi

ngezinsuku ezizayo,” kusho uSimakade.