Abehluleli 5

₂“Uma abaholi bakwa-Israyeli

behamba phambili,

nabantu bazinikela ngokukhululeka,

makadunyiswe uSimakade!

₃“Lalelani makhosi,

bekani indlebe zikhulu,

ngizakumhubela uSimakade

ngizakuhlabelela kuSimakade

uNkulunkulu ka-Israyeli.

₄“Simakade lapho uphuma eSeyiri,

uphuma esifundeni kwa-Edomi

umhlaba wazamazama namazulu ayithulula,

amafu athulula amanzi.

₅Izintaba zathuthumela

phambi kukaSimakade waseSinayi,

phambi kukaSimakade uNkulunkulu ka-Israyeli.

₆“Ezinsukwini zikaShamgari,

indodana ka-Anathi,

ezinsukwini zikaJayeli,

abantu bayibalekela imigwaqo emikhulu,

abahamba ngalezo ndlela bahamba

ngezindlela ezimazombezombe.

₇Imizi yakwa-Israyeli yama ingenamuntu,

Debhora, kwaze kwafika wena,

wafika njengonina ku-Israyeli.

₈Bakhetha onkulunkulu abasha,

kwase kuba khona impi emasangweni.

Phakathi kwezinkulungwane

ezingamashumi amane kwa-Israyeli,

ukhona yini owake waphatha

isihlangu nomkhonto, na?

₉Inhliziyo yami ikubaholi bakwa-Israyeli

abazinikele phakathi kwabantu.

Dumisani uSimakade!

₁₀“Khulumani ngakho,

nina enigibela izimbongolo ezimhlophe,

nina enihlala emacansini ezinjinga,

nani enedlula ngendlela.

₁₁Lalelani umsindo wabaculi besemithonjeni yamanzi,

lapho bephinda ukunqoba kuka-Simakade,

ukunqoba kwezihlupheki kwa-Israyeli.

Abantu bakaSimakade behlela emasangweni.

₁₂“ ‘Vuka, vuka, we Debhora!

Vuka, vuka uhube ihubo.

Vuka, we Bharaki,

hola abathunjwa bakho,

ndodana ka-Abhinowami.’

₁₃“Kwase kwehla insali yesikhulu,

abantu bakaSimakade bahamba

behla ukubhekana nonamandla.

₁₄Kusukela kwa-Efrayimi baphumela esigodini,

kulandela wena Bhenjamini nabafowenu,

kusukela eMakhiri,

bahamba abakhuzi bempi

behla kusukela kwaZebuloni,

kwehla abaphethe induku yomkhuzi wempi.

₁₅Izikhulu zakwa-Isakhare zeza noDebhora,

no-Isakhare wethembeka kuBharaki;

baphuthuma esigodini besezithendeni zakhe.

Phakathi kwabomndeni kaRubeni

kwaba nokuzihlola okukhulu ezinhliziyweni.

₁₆Wahlalelani esihulugwini

ukuze uzwe ukukhala kwemihlambi na?

Phakathi kwabomndeni wakwaRubeni

kwakukhona okukhulu ukuzihlola ezinhliziyweni.

₁₇UGileyadi wahlala phesheya kweJordani;

noDani walibalelani ngasemikhunjini, na?

U-Ashera wahlala akanyakaza ogwini lolwandle,

wahlala ngasethekwini lalo.

₁₈UZebuloni yisizwe samadelakufa,

noNafethali ngokunjalo,

ezindaweni eziphakemeyo zezwe.

₁₉“Amakhosi afika, alwa;

alwa namakhosi aseKhanani,

eThahanakhi, ngasemanzini eMegido;

awatholanga mpango yesiliva.

₂₀Izinkanyezi zalwa ezulwini,

emizileni yazo zalwa noSisera.

₂₁Umfudlana iKhishoni

wabakhukhula,

umfudlana odla izindwani,

umfudlana iKhishoni.

Nyathela,

mphefumulo wami,

nyathela ngamandla.

₂₂Kwezwakala umsindo wezinselo zamahhashi

zigabadula, zigabadula izinjomane ezinamandla.

₂₃‘Qalekisani iMerozi,’

kusho ingelosi kaSimakade;

‘ziqalekiseni kabi izakhamuzi zalo,

ngoba azizanga ukuzosiza uSimakade,

ukuzosiza uSimakade elwa nesiqhwaga.’

₂₄“Ungobusisiwe kwabesifazane,

Jayeli mkaHebhere umKheni,

ungobusisiwe kwabesifazane abahlala emathendeni.

₂₅Wacela amanzi,

wamnika ubisi,

wamlethela izangqondo ngomcengezi

ofanele amakhosi.

₂₆Wabeka isandla sakhe esikhonkwaneni sethende

nesokudla sakhe esandweni sezisebenzi;

wamgqema ingozi uSisera

wamfihliza ikhanda,

wamgqobhoza,

wambhoboza esikhaleni sendlebe.

₂₇Wawa, wadindiliza,

wawa ngasezinyaweni zakhe,

wawela lapho, wafa.

₂₈“Walunguza efasiteleni unina kaSisera,

wakhala ngemuva kwekhethini, ethi:

‘Ilibaleleni inqola yakhe ukubuya, na?

Uphi umsindo wezinqola zakhe, na?’

₂₉Abesifazane bakhe abahlakaniphileyo bayaphendula,

wawuphendula yena uqobo umbuzo:

₃₀‘Bayitholile,

futhi ababelani impango, na?

Intombi, yebo,

izintombi ezimbili endodeni;

impango yezinto ezidayiwe kuSisera,

impango yezinto ezidayiwe zahlotshiswa,

iziqephu ezimbili zomsebenzi oyimpango

odayiwe wahlotshiswa,

ongowentamo yami.’

₃₁“Simakade, sengathi zingabhubha

zonke izitha zakho!

Kodwa abakuthandayo

mabafane nelanga liphuma

ngamandla alo.”