U-Izaya 61

₁UMoya weNkosi uSimakade uphezu kwami,

ngokuba uSimakade ungigcobile

ukuba ngishumayele izindaba ezinhle

kwabathotshisiweyo;

ungithumele ukubopha abanhliziyo zaphukile,

ukumemezela ukukhululwa kwabathunjiweyo,

nokudedelwa kweziboshwa ejele.

₂Ngimemezele unyaka womusa kaSimakade

nosuku lokuziphindiselela kukaNkulunkulu wethu,

ngiduduze bonke abalilayo,

₃ngenze ukuba abalilayo eZiyoni

baphiwe amaqhiya esikhundleni somlotha;

amafutha enjabulo esikhundleni sokulila;

ingubo yokudumisa esikhundleni somoya odangeleyo;

ukuze babizwe ngokuthi yimithi yokulunga,

nokutshalwe nguSimakade, ukuze adunyiswe.

₄Bayokwakha kabusha izincithakalo ezindala,

bavuse izindawo ezazidiliziwe,

balungise imizi ebhujisiweyo,

izindawo esezibe yincithakalo izizukulwane ngezizukulwane.

₅Abezizwe bayokuma beluse imihlambi yenu,

abafokazi babe ngabalimi benu,

nabaphathi bezivini zenu.

₆Kodwa nina niyakubizwa ngokuthi

ningabaphristi bakaSimakade,

kuyakuthiwa ngani niyizikhonzi zikaNkulunkulu wethu;

niyakudla imfuyo yezizwe,

nizibonge ngodumo lwazo.

₇Esikhundleni sehlazo lenu,

niyakuphiwa ngokuphindiweyo;

esikhundleni sokudumala,

ukujabula kuyakuba yisabelo sabo;

bayakudla ifa ngokuphindiweyo ezweni lakubo,

intokozo engunaphakade ibe ngeyabo.

₈“Mina Simakade ngithanda ubulungiswa,

ngiyakuzonda ukuphanga nokubi;

ngiyakubanika umvuzo wabo ngeqiniso,

ngenze nabo isivumelwano esiphakade.

₉Abantwana babo bayakwaziwa phakathi kwezizwe,

nezizukulwane zabo phakathi kwabantu;

bonke abababonayo bayovuma

ukuthi bayisizukulwane uSimakade asibusisile.”

₁₀Ngiyothokoza kakhulu ngoSimakade,

umphefumulo wami wename ngoNkulunkulu wami,

ngokuba ungembathise izingubo zensindiso,

wangisibekela ngesembatho sokulunga,

okomyeni ethwele umshuqulu njengomphristi,

nanjengomakoti ezihlobise ngemvunulo.

₁₁Njengokuba umhlaba uveza ihlumela lawo,

nanjengokuba insimu ihlumisa okutshalwe kuyo,

kanjalo iNkosi uSimakade

iyokuveza ukulunga nodumo

phambi kwezizwe zonke.