U-Izaya 59

₁Isandla sikaSimakade asifinyeziwe ukuba sisindise,

nendlebe yakhe ayibuthuntu ukuba izwe.

₂Kodwa ububi benu bunahlukanisile noNkulunkulu,

nezono zenu zibusithile

ubuso bakhe kini

ukuba anganizwa.

₃Izandla zenu zingcoliswe yigazi,

neminwe yenu, yinkohlakalo;

izindebe zemilomo yenu zikhulume amanga,

nezilimi zenu zinyenyeza okubi.

₄Akekho omemeza ngokulunga,

akekho nowehlulela ngeqiniso;

bethembela kokuyize,

bakhuluma amanga;

bakhulelwe ububi,

bazala inkohlakalo.

₅Bachamsele amaqanda ebululu,

baluka ubulwembu besicabucabu;

odla amaqanda abo uyokufa,

okuchotshozwayo kuqhamuka kuyibululu.

₆Ubulwembu baso abuyukuba yingubo,

abanakuzimboza ngalokho abakwenzileyo;

imisebenzi yabo ingeyobubi

nezenzo zendluzula zisezandleni zabo.

₇Izinyawo zabo zigijimela ebubini;

bayashesha ukuchitha igazi elingenacala;

imicabango yabo iyimicabango yenkohlakalo;

incithakalo nokubhujiswa

kugcwele ezindleleni zabo.

₈Indlela yokuthula abayazi,

nobulungiswa abukho emikhondweni yabo;

bazenzele izindlela eziyizigwegwe,

bonke abahamba ngazo abakwazi ukuthula.

₉Ngalokho ukwehlulela kukude nathi,

nokulunga akusifumani;

silindela ukukhanya simagange,

kodwa sibona ubumnyama;

silindela ukukhanya,

kodwa sidukuza ebumnyameni.

₁₀Sidukuza sigudla udonga njengempumputhe,

yebo, sidukuza siphumputha njengabangenamehlo;

sikhubeka emini kungathi sekuhwalele;

phakathi kwabaphilayo, sinjengabafileyo.

₁₁Sonke sigwavuma njengamabhele,

siyakhala nokukhala njengamajuba;

silindela ukwehlulela, kodwa akukho,

nokusindiswa, kodwa kukude nathi.

₁₂Ngokuba iziphambeko zethu

ziningi phambi kwakho,

nezono zethu ziyafakaza ngathi;

ngokuba iziphambeko zethu zikithi,

nobubi bethu siyabazi:

₁₃Sonile, samphika uSimakade;

sihlubukile, asamlandela uNkulunkulu wethu;

sikhulume ngokucindezela, nangokwambuka,

sicabangile, sakhuluma amanga asenhliziyweni.

₁₄Ubulungiswa bubuyiselwe emuva,

nokulunga kuma le kude,

ngokuba iqiniso liyakhubeka esigcawini,

nobuqotho abukwazi ukungena.

₁₅Iqiniso alikho;

osuka ebubini uphenduka impango;

uSimakade ukubonile lokho,

kwakukubi emehlweni akhe

ukuthi ubulungiswa babungekho.

₁₆Wabona ukuthi kwakungekho muntu,

wamangala ukuthi kwakungekho onxusayo;

ngakho-ke ingalo yakhe yamzuzela insindiso,

nokulunga kwakhe kwamphasa.

₁₇Wembatha ukulunga njengebhantshi lensimbi,

nesigqoko sensindiso ekhanda lakhe;

wagqoka izingubo zokuphindisela

zaba ngezokwembatha;

wazisonga ngokushisekela njengengubo.

₁₈Uyoziphindiselela kubo njengokwezenzo zabo,

ulaka ezitheni zakhe,

nenkokhelo efanele kwabamelene naye,

nabaseziqhingini bayothola inkokhelo

efanele izenzo zazo.

₁₉Labo abasentshonalanga bayakulesaba igama likaSimakade,

abasempumalanga besabe inkazimulo yakhe,

ngokuba uyakufika njengomfula ongenisayo,

oqhutshwa ngumoya kaSimakade.

₂₀“Uyofika eZiyoni njengoMhlengi,

nakulabo bakwaJakobe

abaphenduke eziphambekweni,” kusho uSimakade.