U-Izaya 57

₁Olungileyo uyabhubha,

akekho okubeka enhliziyweni lokho;

abantu abanomusa bayasuswa,

kungaqondi muntu.

Olungileyo uyasuswa enhlekeleleni,

₂angene ekuthuleni.

Abahambe ngobuqotho

bayophumula emibhedeni yabo.

₃“Sondelani nina madodana abahlola imihlola,

nina nzalo yesiphingi neyesifebe.

₄Nihlekisa ngobani,

nikhamisela bani umlomo,

nivezela bani ulimi

ngaphandle na?

Anisibo yini abantwana besiphambeko,

inzalo yamanga;

₅nina enisha yizinkanuko

phakathi kwemi-okhi,

phansi kwayo yonke imithi eluhlaza;

enibulala abantwana ezigodini,

phansi kwemifantu yamadwala na?

₆Isabelo sakho siphakathi

kwamatshe abushelelezi asesigodini;

yiwona angawonkatho lwakho;

nakuwo uthululele umnikelo wokuphuzwayo,

wenza umnikelo wokusanhlamvu.

Ngimelwe ukweneliswa yini ngalokho na?

₇Uwubekile umbhede wakho

entabeni ende nephakemeyo,

waphinde wakhuphukela khona

ukunikela ngomhlatshelo.

₈Wabeka isithombe sakho

emva kwezicabha nezinsika,

wangifulathela,

wazembulela omunye kunami,

wakhwela embhedeni wakho, wawandisa,

wavumelana nabo,

wayithanda imibhede yabo,

wabuka ubuntu babo.

₉Waya kuMolokhi uphethe amafutha,

wawandisa amakha akho.

Wathumela kude izithunywa zakho,

wazehlisela nasendaweni yabafileyo,

₁₀wakhathala ngenxa yobude bendlela,

kodwa awuzange uthi:

‘Kuyize.’

Wathola amandla aneleyo,

ngalokho awuphelanga amandla.

₁₁“Ngubani owawunovalo ngaye,

futhi umesaba,

waze waqamba amanga;

awungikhumbulanga,

futhi awukufakanga enhliziyweni yakho na?

Angithulanga yini kwaze kweqa,

okukwenze awaba nakungesaba na?

₁₂Mina ngiyakukudalula ukulunga kwakho

nemisebenzi yakho;

kepha akuyukukusiza.

₁₃Lapho ukhala,

iqoqo lezithombe zakho

malikusindise phela;

nokho umoya uzoziphephula zonke,

ukuphefumula kuzithathe;

kodwa lowo ofuna ukuphephela kimi,

uyakudla ifa lezwe,

adle nefa lentaba yami engcwele.”

“Hlelani, hlelani, lungisani indlela,

nisisuse isikhubekiso endleleni yabantu bami.”

₁₅Usho kanje ophezulu nophakemeyo,

ohlala kuze kube phakade,

ogama lakhe lingoNgcwele, uthi:

“Ngihlala endaweni ephakemeyo nengcwele,

nakulowo onomoya odabukileyo nothobekileyo,

ukuvuselela umoya wabathobekileyo,

nokuphilisa izinhliziyo zabazisolayo.

₁₆Ngokuba angiyukulwa kuze kube phakade,

angiyukuthukuthela ingunaphakade;

funa umoya ophambi kwami

uphelelwe ngamandla,

ngisho nemiphefumulo engiyenzileyo.

₁₇Ngathukuthela ngenxa yobubi bokuhaha kwakhe,

ngamshaya, ngazisitheza ngisathukuthele,

kodwa waqhubeka ehlubukela

ezindleleni zenhliziyo yakhe.

₁₈Ngizibonile izindlela zakhe,

ngiyakumphilisa;

ngizakumhola,

ngimbuyisele ukududuzeka,

yena nabamlilelayo.

₁₉Ngizodala izithelo zezindebe zomlomo, ngithi:

ukuthula, ukuthula kuye okude,

nakuye oseduze,” kusho uSimakade;

“ngiyakumphilisa.”

₂₀Ababi banjengolwandle olugubhayo,

olungakwazi ukuthula,

olumanzi alo akhipha udaka nobishi.

₂₁“Akukho ukuthula ezikhohlakalini,” kusho uNkulunkulu wami.