U-Izaya 55

₁“We nina nonke enomileyo,

wozani emanzini;

nani eningenamali

wozani nithenge, nidle;

wozani nithenge mahhala,

yebo, iwayini nobisi,

kungabizi mali.

₂Niyichithelani imali kukho okungesiso isinkwa,

nenzuzo yenu kukho okungenelisiyo na?

Ngilaleleni nokungilalela, nidle okuhle,

umphefumulo wenu ujabule ngamanoni.

₃Bekani izindlebe, nizwe,

nize kimi, uyophila umphefumulo wenu;

ngiyokwenza nani isivumelwano esiphakade,

izenzo zomusa oqinisekileyo zikaDavide.

₄Bheka, ngimenze abe ngufakazi kubantu,

umholi nomyali wabantu.

₅Bheka, uyobiza izizwe ongazazi,

nezizwe ebezingakwazi zigijimele kuwe

ngenxa kaSimakade uNkulunkulu wakho

nangenxa yoNgcwele ka-Israyeli,

ngokuba ukudumisile.”

₆Mfuneni uSimakade esenokutholwa,

nimbize eseseduze.

₇Omubi makayishiye indlela yakhe,

nomuntu owenza ibe mibi imicabango yakhe,

abuyele kuSimakade,

uyokuba nomusa kuye,

abuyele kuNkulunkulu wethu,

ngokuba uyophiwa intethelelo enkulu.

₈“Ngokuba imicabango yami

ayisiyo imicabango yenu,

nezindlela zenu

azisizo izindlela zami,” kusho uSimakade.

₉“Njengalokhu amazulu ephakeme kunomhlaba,

kanjalo izindlela zami ziphakeme kunezindlela zenu,

nemicabango yami

kunemicabango yenu.

₁₀Imvula neqhwa kwehla kuvela ezulwini,

akubuyeli khona,

kunalokho kumatisa umhlaba,

kuwenze uhlume,

uthele,

unike ohlwanyelayo inhlwanyelo,

nodlayo ukudla.

₁₁Liyoba njalo izwi lami,

eliphuma emlonyeni wami:

aliyukubuyela kimi lilambatha,

lingakakufezi lokho engikufunayo,

liphumelele kulokho engilithumelele khona.

₁₂Niyophuma ngentokozo,

niholwe ngokuthula;

izintaba namagquma kuyoqhumuka

kuhlabelele phambi kwenu,

nemithi yonke yasendle iyoshaya ihlombe.

₁₃Esikhundleni sogagane,

kuyomila umsayiphuresi;

nasesikhundleni samakhakhasi,

kumile umbomvana.

Kuyokuba yisikhumbuzo kuSimakade,

nesibonakaliso saphakade esingeyukuphela, esingasayukunqunywa.”