U-Izaya 54

₁“Memeza ngokujabula wena nyumba,

wena ongazalanga, qhumuka,

umemeze ngokuthokoza,

dazuluka wena ongakaze uhelelwe;

ngokuba abantwana boyisikhwebu baningi

kunabantwana bonendoda,” kusho uSimakade.

₂Yenze ibe banzi, indawo yethende lakho;

mabazelule izihenqo zezindlu zenu, ungazibambezeli;

yelula izintambo zakho,

uziqinise izikhonkwane zakho.

₃Ngokuba uyakusabalalela ngakwesokunene nangakwesokhohlo;

nabozalo lwakho bayakubusa izizwe,

bakhe imizi echithekileyo.

₄“Ungesabi, ngokuba awuyukujabha;

ungapheli amandla,

ngokuba awuyukuthelwa ngehlazo;

uyakukhohlwa yihlazo lobusha bakho,

ungabe usawakhumbula

amahloni obufelokazi bakho.

₅Ngokuba uMenzi wakho ungumyeni wakho,

nguSimakade Wamabandla, igama lakhe;

oNgcwele ka-Israyeli onguMhlengi wakho,

obizwa ngokuthi nguNkulunkulu womhlaba wonke.

₆USimakade ukubizile njengomfazi oshiyiweyo

nodabukileyo emoyeni;

umfazi wobusha ukhona olahliweyo.”

kusho uNkulunkulu wakho.

₇“Ngakushiya okwesikhashana,

kodwa ngomusa omkhulu ngizokuqoqa.

₈Ngentukuthelo echichimayo,

ngabusitheza ubuso bami kuwe isikhashana,

kepha ngesihawu esingapheliyo, ngiyokuhawukela,”

kusho uSimakade uMhlengi wakho.

₉“Lokho kimi kufana namanzi

ezinsukwini zikaNowa:

njengalokho ngafunga

ukuthi amanzi kaNowa

awasayukubuye awemboze umhlaba,

kanjalo sengifungile

ukuthi ngeke ngisakuthukuthelela,

futhi ngeke ngikusole.

₁₀Yebo, izintaba zingasuswa,

namagquma azanyazanyiswe,

kodwa umusa wami awuyukusuka kuwe,

nesivumelwano sami sokuthula asiyukususwa,”

kusho uSimakade okuhawukelayo.

₁₁“Wena ohluphekayo,

ohlukunyeziwe, ongaduduzwanga,

bheka, ngizokufaka amatshe esiliva,

izisekelo zakho zibe ngamasafire.

₁₂Imibhoshongo yakho ngiyoyenza ngamarubhi,

amasango akho ngekhristalo,

nayo yonke imingcele yakho

ibe ngamatshe ayigugu.

₁₃Bonke abantwana bakho bayakufundiswa nguSimakade,

kube nokuthula okukhulu kubantwana bakho.

₁₄Uyakumiswa ngokulunga;

ube kude nokucindezelwa,

ngokuba awuyukwesaba,

novalo luyoba kude nawe.

₁₅Uma kukhona okuqalayo,

kuyobe kungaveli kimi lokho;

noma ngubani okuqalayo

uyakuwa ngenxa yakho.

₁₆“Mina ngidale umkhandi

ovuthela amalahle emlilweni,

akhiqize izikhali ezilungele umsebenzi wakhe;

Mina ngidalile futhi umbhubhisi,

ukuba abhubhise.

₁₇Asikho isikhali esenzelwa wena esiyakuphumelela;

uyakumisa lonke ulimi olukuvukelayo ekwehlulelweni;

lokhu kuyifa lezinceku zikaSimakade

nokumelwa kwazo okuvela kimi,”

kusho uSimakade.