U-Izaya 41

₁“Thulani phambi kwami, nina ziqhingi,

izizwe mazithole amandla amasha,

mazisondele bese zikhuluma,

mazisondele zonke

ukuba zehlulelwe ndawonye.

₂“Ngubani okuvusile ukulunga

ukuba kuphume empumalanga,

akubize ukuba kumlandele,

anikele izizwe phambi kwakhe,

anyathele amakhosi,

awenze abe njengothuli ngenkemba yakhe,

nanjengamabibi epheshulwa ngumnsalo wakhe na?

₃Uyabaxosha, adlule ngokuthula,

kungathi kalubeki phansi

endleleni unyawo lwakhe.

₄Ngubani okwenzileyo lokhu, wakudala,

wabiza izizukulwane kwasekuqaleni na?

Mina, Simakade ngingowokuqala,

futhi ngingowokugcina.”

₅Iziqhingi zibonile, ziyesaba;

imikhawulo yomhlaba iyathuthumela,

iyasondela, futhi isifikile.

₆Yilowo nalowo usiza umakhelwane wakhe

ethi esihlotsheni sakhe:

“Yima isibindi.”

₇Umbazi uqunga umkhandi isibindi,

nololonga ngesando uqunga oshaya

isikhandelo isibindi,

ethi konamathelisa ngomthofi:

“Kuhle,”

ekuqinisa ngezipikili,

ukuze kunganyakaziswa.

₈“Kepha wena Israyeli, nceku yami,

wena Jakobe engikukhethileyo,

wozalo luka-Abhrahama umngani wami,

₉wena engikuthathe emikhawulweni yomhlaba,

ngakubiza emajukujukwini awo,

ngathi kuwe:

‘Wena uyinceku yami,

ngikukhethile, angikulahlanga.’

₁₀Ungesabi, ngokuba Mina nginawe;

ungabi naluvalo, ngokuba Mina

nginguNkulunkulu wakho;

ngiyakuqinisa, futhi ngiyakusiza,

yebo, ngiyakusekela ngesandla sokunene

sokulunga kwami.

₁₁“Bazoba namahloni, bajabhiswe

bonke abakuthukuthelele,

bayoba njengento engelutho,

babhubhe bonke abamelana nawe.

₁₂Uyakubafuna, kodwa awuyukubafumana;

labo bantu abaxabana nawe,

abalwa nawe, bayakuba njengento engelutho, nanjengeze.

₁₃Mina nginguSimakade uNkulunkulu wakho,

okubamba ngesandla sakho sokunene,

athi kuwe: ungesabi, ngiyakusiza.

₁₄Ungesabi wena mpethu, Jakobe,

nani bantu bakwa-Israyeli;

Mina ngiyokusiza,” kusho uSimakade

uMhlengi wakho oNgcwele ka-Israyeli.

₁₅“Ngizokwenza ube yisibhulo esisha,

esibukhali esinamazinyo;

uyobhula izintaba, uzicolise,

wenze amagquma abe njengamakhoba.

₁₆Uyowahlakaza, umoya uwasuse,

isivunguvungu siwachithe;

uyothokoza ngoSimakade,

uzibonge ngoNgcwele ka-Israyeli.

₁₇“Abampofu nabaswelayo bafuna amanzi,

kodwa abawafumani,

ulimi lwabo lugagadekile wukoma;

Mina Simakade ngiyakubaphendula,

Mina Nkulunkulu ka-Israyeli angiyukubashiya.

₁₈Ngiyakuvula imifula emadulini angenalutho,

nemithombo phakathi kwezigodi;

ngiyalenza ihlane libe yichibi lamanzi,

nomhlabathi owomileyo

ube yiziphethu zamanzi.

₁₉Ngiyakutshala umsedari ehlane,

umtholo, umbomvana, nomnqumo,

ngibeke kwahlongasibi umsayiphuresi,

umthidari nomkhoba kanyekanye,

₂₀ukuze babone futhi bazi,

baqaphele, babe nokuqonda

ukuthi yisandla sikaSimakade esenze lokho,

nokuthi ngoNgcwele ka-Israyeli okudalile.

₂₁“Lethani udaba lwenu,”

kusho uSimakade,

“nisondeze izizathu zenu,” kusho iNkosi kaJakobe.

₂₂“Mabasondele, basitshele okuyakwenzeka,

ukuthi zaziyini izinto zakuqala na?

Mabasitshele zona

ukuba sizibeke ezinhliziyweni zethu,

sazi umphumela wazo,

noma sazi izinto ezizayo.

₂₃Sitsheleni okuzayo ngesikhathi esizayo,

sazi ukuthi ningonkulunkulu;

yebo, yenzani okuhle noma okubi,

ukuze sesabe, sikubone kanyekanye.

₂₄Bhekani, nivela ezeni,

nemisebenzi yenu ayilutho;

uyisinengiso onikhethayo.

₂₅“Ngimvusile enyakatho, futhi usefikile,

kusukela ekuphumeni kwelanga,

uyakubiza iGama lami;

uyakwehlela phezu kwababusi

njengaphezu kodaka,

nanjengombumbi exovaxova ibumba.

₂₆Ngubani owakushoyo kwasekuqaleni ukuze sazi,

nangaphambili ukuba sisho sithi:

‘Uqinisile’ na?

Qha, akekho okumemezelileyo,

akekho nokuzwisileyo,

akekho nowezwa amazwi enu.

₂₇Mina ngingowokuqala

okumemezele eZiyoni,

nganika iJerusalema

isithunywa sezindaba ezinhle.

₂₈Kepha lapho ngibheka, akukho muntu;

akekho phakathi kwabo umeluleki

ongaphendula ngezwi, lapho ngibabuza.

₂₉Bheka, bonke bayize;

imisebenzi yabo iyinto engelutho,

nezithombe zabo ezibunjiweyo

zingumoya nento engekho.”