U-Izaya 24

₁Manje uSimakade usezowenza incithakalo umhlaba,

ube yize,

agumbuqele ubuso bawo,

ahlakaze abakhileyo kuwo.

₂Njengoba kuyakuba njalo kubantu,

kuyakuba njalo nakubaphristi;

njengoba kuyakuba njalo nasesigqileni,

kuyakuba njalo nakumniniso;

njengoba kunjalo encekukazini,

kuyakuba njalo nasenkosikazini;

njengoba kunjalo kumthengi,

kuyakuba njalo nakumthengisi;

njengoba kunjalo kobolekisayo,

kuyakuba njalo nakobolekayo;

njengoba kunjalo kokweletisayo,

kuyakuba njalo nakokweletayo.

₃Umhlaba uyokuba yincithakalo,

uphangwe impela,

ngokuba uSimakade ulishilo leli lizwi.

₄Umhlaba womile, ubunile,

izwe liyashabalala, liyaphela,

abahloniphekile bomhlaba bayaphela.

₅Umhlaba ungcolisiwe ngabakhileyo kuwo,

ngokuba bayeqile imithetho,

baphambuka ezimisweni,

basephula isivumelwano saphakade.

₆Ngakho-ke isiqalekiso

siyawubhuqabhuqa umhlaba,

izakhamuzi zitholwe zinecala;

ngalokho abakhileyo emhlabeni bayashiswa,

kusale ingcosana nje kuphela.

₇Iwayini elisha liphelile,

imivini iyabuna;

bayabubula bonke abanhliziyo zeneme.

₈Ukuzijabulisa ngokhehlegume akusekho,

ukuxokozela kwabajabulayo kuphelile,

nenjabulo yehabhu inqamukile.

₉Abasahubi lapho bephuza iwayini,

uphuzo olunamandla seluyababa

kulabo abaluphuzayo.

₁₀Umuzi wenxushunxushu ubhidliziwe,

zonke izindlu zivaliwe

ukuze kungangeni muntu kuzo.

₁₁Kunesililo emigwaqweni,

kukhalelwa iwayini;

yonke intokozo iphele nya,

injabulo yezwe ixoshiwe.

₁₂Kusele incithakalo emzini,

amasango afahlaziwe aba yimvithi.

₁₃Kuyokuba kanjalo emhlabeni phakathi kwezizwe.

Kuyakuba njengomnqumo uvithikile,

nanjengokukhothoza sekwedlule

isikhathi sokuvuna amagilebhisi.

₁₄Abantu bayophakamisa izwi labo,

bababaze ubukhosi bukaSimakade entshonalanga.

₁₅Ngakho-ke empumalanga

mdumiseni uSimakade,

emazweni asogwini likhazimuliseni igama likaSimakade

uNkulunkulu ka-Israyeli.

₁₆Emikhawulweni yomhlaba

sizwa amahubo okudumisa, athi:

“Udumo malube koLungileyo!”

Kodwa mina ngithi:

“Maye, kimina,

ngokuba ngiyafa, ngiyafa!”

Ngokuba abakhohlisi bakhohlisile,

abakhohlisi bakhohlisile kakhulu.

₁₇Ukwesaba, umgodi nogibe kuphezu kwenu,

nina enakhileyo emhlabeni.

₁₈Kuyothi obalekela umsindo wokwesaba

awele emgodini;

ophuma emgodini uyobanjwa wugibe.

Ngokuba amafasitela ezulu avuliwe,

nezisekelo zomhlaba ziyazamazama.

₁₉Umhlaba uyophihlizwa,

ube yimvithi, uqhekezeke,

umhlaba uyakuzanyazanyiswa kanzima.

₂₀Umhlaba uzontengezela njengodakiweyo,

untengantenge njengexhokovana,

isiphambeko sawo siyakuba nzima

phezu kwawo,

uwe ungaphinde uvuke nanini.

₂₁Ngalolo lusuku uSimakade

uyowajezisa amabandla asezulwini phezulu,

namakhosi omhlaba emhlabeni.

₂₂Bayohlanganiswa ndawonye,

njengeziboshwa ziqoqelwa emgodini,

bayovalelwa ejele,

kuthi emva kwezinsuku eziningi, bajeziswe.

₂₃Inyanga iyakukhophozela,

ilanga libe namahloni,

ngokuba uSimakade Wamabandla

uyobusa entabeni iZiyoni naseJerusalema,

phambi kwamalunga akhe,

inkazimulo yakhe

ibe phambi kwamalunga akhe.