U-Izaya 18

₁Maye, kuwe lizwe elibhakuzisa amaphiko,

eliphesheya kwemifula eKhushe,

₂elithumela izithunywa ngolwandle,

zintweze emanzini ngemikhumbi yomhlanga!

Hambani zithunywa ezinejubane,

niye esizweni sabantu abade

abasikhumba sibushelelezi,

abantu abesatshwa kude naseduze,

isizwe esinamandla nezidlova;

esizwe laso lihlukaniswe yimifula.

₃Nina nonke enakhile ezweni,

nina nonke enihlezi emhlabeni,

bhekani lapho sekuphakanyiswa ibhanela ezintabeni,

nilalele lapho kukhala icilongo.

₄Ngokuba ungitshelile uSimakade, wathi:

“Ngizobuka, ngithule ngisendaweni yami,

njengokushisa kwelanga,

nanjengefu lamazolo ekushiseni ngesikhathi sokuvuna.”

₅Ngokuba ngaphambi kokuvuna,

lapho imbali isiqhakaze

yaze yaphenduka igilebhisi elivuthiweyo,

uzowanquma wonke amagatsha ngocelemba,

namagatsha enabileyo uwanqume, uwasuse.

₆Ayoshiywa ndawonye,

abe ngawamanqe asezintabeni,

nawezilwane zasemhlabeni.

Amanqe ayohlala kuwo ehlobo,

ebusika kuhlale kuwo zonke izilwane zomhlaba.

₇Ngaleso sikhathi abantu abade,

abanesikhumba esibushelelezi,

bayoletha izipho kuSimakade Wamabandla,

zivela kubantu abesatshwa kude naseduze;

isizwe esinamandla nesinqobayo,

esilizwe laso lihlukaniswe yimifula.

Bayoziletha entabeni iZiyoni,

indawo yegama likaSimakade Wamabandla.