U-Izaya 14

₁USimakade uyoba nesihawu kuJakobe,

abuye amkhethe u-Israyeli,

amuphe ukuthula ezweni lakhe;

nabafokazi bayozihlanganisa naye,

banamathele endlini kaJakobe.

₂Izizwe ziyobathumba,

zibayise endaweni yazo;

indlu ka-Israyeli iyozidla lezo zizwe,

zibe yifa layo,

zibe yizinceku nezincekukazi

ezweni likaSimakade;

iyobathumba labo ababekade beyithumbile,

ibuse phezu kwabacindezeli bayo.

“Yeka ukuphela komcindezeli

nokuqedwa kokuqhosha!

₅USimakade waphule induku yezikhohlakali

nentonga yababusi,

₆eyashaya abantu ngentukuthelo ingaphezi,

yabusa izizwe ngolaka

nangokucindezela okunganqandekiyo.

₇Wonke umhlaba uphumule, unokuthula;

kuqhumuke inhlokomo kubantu.

₈Ngisho imisayiphuresi nemisedari eLebhanoni,

iyathokoza ngawe,

ithi: ‘Selokhu walaliswa phansi,

akukho mgawuli okhuphukele kithi

ukuba asigawule.’

₉Indawo yabafileyo phansi inyakazisiwe

ukuba ikuhlangabeze uma ufika kuyo,

ikuvusele izithunzi

zazo zonke izikhulu zomhlaba,

isukumise wonke amakhosi ezizwe

ezihlalweni zawo zobukhosi.

₁₀Wonke ayophendula, athi kuwe:

‘Kanti nawe usubuthakathaka njengathi,

usufana nathi?’

₁₁Ukuphakama kwakho

sekwehliselwe endaweni yabafileyo,

kanjalo nomsindo wezingubhu zenu;

izimpethu zendlaliwe phansi kwakho,

nezibungu ziyakusibekela.

₁₂“Yeka ukuwa kwakho ezulwini,

khwezi elikhanyayo,

ndodana yokusa,

nokuqunjwa kwakho phansi,

wena owawunqoba izizwe.

₁₃Wena wathi enhliziyweni yakho:

‘Ngiyokhuphukela ezulwini,

ngiphakamise isihlalo sami sobukhosi

phezu kwezinkanyezi zikaNkulunkulu;

ngiyohlala entabeni yomhlangano

ngasemaphethelweni aseZafoni.

₁₄Ngiyokhuphuka ezindaweni

eziphakemeyo phezu kwamafu,

ngizenze ngibe njengoPhezukonke.’

₁₅Nokho wehliselwe endaweni yabafileyo,

emajukujukwini omgodi.

₁₆“Abakubonayo bayokubhekisisa,

bakuqaphelisise, bese bethi:

‘Nguye yini lo muntu

owazamazamisa umhlaba,

wanyakazisa imibuso,

₁₇owenza izwe laba yihlane,

wabhubhisa imizi yalo,

akazivumela iziboshwa

ukuba zibuyele emakhaya na?’

₁₈Wonke amakhosi ezizwe,

wonke alale ngodumo,

yileyo naleyo edlinzeni layo.

₁₉Kodwa wena ulahlwe ngaphandle

kwethuna lakho

njengegatsha elinengekayo,

ligqokwe ngababuleweyo,

abagwazwe ngenkemba,

behlela emgodini wamatshe

njengesidumbu esinyathelweyo.

₂₀Awusoze wahlangana nabo egodini,

ngokuba waba yimbangela

yencithakalo ezweni lakini;

wabulala abantu bakini.

Sengathi izizukulwane zezikhohlakali

zingebe zisaphathwa naphakade.

₂₁Lungisani indawo yokubulalela abantwana bakhe,

ngenxa yenkohlakalo yokhokho babo.

Mabangaphinde bavuke,

ukuba badle ifa lomhlaba,

bagcwalise izwe ngemizi.

₂₂“Ngiyobavukela,”

kusho uSimakade Wamabandla,

“nginqume eBhabhele igama nensali,

indodana nomzukulu,”

kusho uSimakade.

₂₃“Ngiyolenza libe yifa lezingungumbane

namaxhaphozi anomhlanga,

ngiyolishanela ngomshanelo wembubhiso,”

kusho uSimakade Wamabandla.

“Impela njengoba ngihlosile kuyokuba kanjalo,

nanjengoba ngihlelile kuyokuma kanjalo,

₂₅ukuthi ngiyolicoboshisa i-Asiriya ezweni lami,

ngiligxobe ezintabeni zami;

lisuswe kubantu bani ijoka lalo

nomthwalo walo osemahlombe abo.”

₂₆Yilesi isinqumo esinqunyiwe emhlabeni wonke;

yilesi isandla esizoshaya izizwe zonke.

₂₇Ngokuba uSimakade Wamabandla unqumile;

ngubani oyakuguqula lokho na?

Isandla sakhe sizogadla;

ngubani oyakusinqanda na?

₂₉Ungathokozi wena Filistiya namaphethelo,

ngokuthi intonga ekushayileyo yephukile,

ngokuba esiqwini senyoka kuyophuma ibululu,

nenzalo yalo ibe yinkanyamba endizayo.

₃₀Amazibulo abampofu ayodla,

abantulayo balale belondekile;

kodwa ngiyobulala impande yakho ngendlala,

ngibhubhise nensali yakho.

₃₁Lila wena sango,

udazuluke wena muzi;

phela amandla wena Filistiya lonke!

Ngokuba kuvela intuthu enyakatho;

akekho oyokwehlukana nebutho lakhe.

₃₂Ziyophendulwa ngokuthini izithunywa zesizwe na?

Kuyothiwa nguSimakade omisele abahluphekileyo

babantu bakhe iZiyoni,

ukuba bayophephela kulo.