UHoziya 13

₁Bekuthi uma u-Efrayimi ekhuluma,

kube nokuthuthumela,

wayephakanyisiwe kwa-Israyeli,

kodwa waba necala ngokukhonza uBhali, wayesefa.

₂Manje bayaqhubeka nokona,

bazenzele imifanekiso ebunjiweyo ngesiliva labo,

nezithombe ezibaziweyo ngobungcweti babo,

konke lokhu kungumsebenzi wezingcweti,

bakhuluma kubo, bathi:

“Abenza umhlatshelo

kumele bange amathole.”

₃Ngakho-ke bayakuba njengofasimba,

bafane namazolo asekuseni eshabalala,

nanjengamakhoba epheshulwa ngumoya esibuyeni

nentuntu ephuma ngoshimula.

₄Kepha Mina nginguSimakade uNkulunkulu wakho

selokhu kwaba seGibhithe;

awuyukumazi omunye uNkulunkulu

ngaphandle kwami,

akekho futhi omunye uMsindisi

ngaphandle kwami.

₅Mina ngakwazi ehlane ezweni lesomiso.

₆Basutha ngokwamadlelo abo,

kuthe sebesuthi bazigqaja,

base bengikhohlwa Mina.

₇Ngase ngiba njengebhubesi kubo,

ngacutha endleleni njengengwe.

₈Ngiyakubathelekela njengebhele

eliphucwe amazinyane alo,

ngibadabule isifuba esivikele inhliziyo yabo,

ngibashwabadele lapho njengebhubesi,

isilwane sasendle sibanephunephule.

₉Uzakubhujiswa, Israyeli,

ngokuba umelene nami,

umsizi wakho.

₁₀Iphi inkosi yakho manje

ukuze ikusindise kuyo yonke

imizi yakho, na?

Baphi abaholi bakho, wena owathi ngabo:

“Nginike inkosi nabaholi” na?

₁₁Ngakunika inkosi ngentukuthelo yami,

ngayithatha ngolaka lwami.

₁₂Ububi buka-Efrayimi bulondoloziwe,

isono sakhe siqoshiwe.

₁₃Imihelo yobelethayo iyakumfikela,

uyindodana engahlakaniphile,

ngokuba kuthi sekuyisikhathi sokuba azalwe

angezi emnyango wesibeletho.

₁₄Ngiyakubahlawulela yini esandleni sendawo yabafileyo,

ngibahlenge yini ekufeni na?

Kufa, luphi ubhubhane lwakho na?

Ndawo yabafileyo,

kuphi ukubhubhisa kwakho na?

uzwelo lufihlakele emehlweni ami.

₁₅“Noma angaba yindodana

enempumelelo kubafowabo,

kuyakufika umoya wasempumalanga,

umoya kaSimakade ovela ehlane;

umthombo wakhe uyakuba namahloni,

isiphethu sakhe sishe;

uyakuphanga ingcebo yakhe,

nazo zonke izinto eziyigugu.

₁₆ISamariya liyakuba necala,

ngokuba limhlubukile uNkulunkulu walo;

bayakufa ngenkemba,

izingane zabo ziphahlazwe,

abakhulelweyo baqaqwe.”