U-Isaka Ubusisa UJakobe
1Kwathi lapho u-Isaka esegugile, namehlo akhe esefiphele, engasaboni kahle, wabiza indodana yakhe endala, wathi: “Ndodana yami!”
Yathi kuye: “Ngilapha.”
2U-Isaka wathi: “Sengimdala, futhi angilwazi usuku engizofa ngalo. 3Ngakho-ke thatha umcibisholo nomnsalo wakho uye endle, ungizingelele inyamazane, 4ubuye ungiphekele isilovela esehla esiphundu, usilethe kimi, ngidle, bese ngikubusisa ngingakafi.”
5URibheka wayelalele lapho u-Isaka ekhuluma nendodana yakhe u-Esawu. Ngakho-ke kuthe ukuba aphume u-Esawu ukuyozingela inyamazane, 6uRibheka wathi endodaneni yakhe uJakobe: “Ngimzwile uyihlo ethi kumfowenu u-Esawu: 7‘Ngilethele inyamazane, ungiphekele isilovela esehla esiphundu, ngidle, bese ngiyakubusisa phambi kukaSimakade ngingakafi.’ 8Mntanami, lalela amazwi ami, wenze engikuyala ngakho. 9Hamba uye emhlanjini, ufike ungithathele amazinyane amabili ekhethelo, ukuze ngiphekele uyihlo isilovela esehla esiphundu, njengoba esithanda, 10bese wena usithatha usisa kuye, asidle, akubusise engakafi.”
11UJakobe wathi kunina uRibheka: “Bheka, umnewethu u-Esawu uphuphuzela uboya, kanti mina nginesikhumba esibushelelezi. 12Mhlawumbe ubaba angase angiphathe ngesandla, bese kuba sengathi ngimenza isilima, ngizilethele isiqalekiso esikhundleni sesibusiso.”
13Unina wathi kuye: “Isiqalekiso esibhekiswe kuwe masehlele kimi mntanami. Wena lalela engikushoyo, ungilandele amazinyane lawo.”
14Wahamba wawalanda amazinyane, wawaletha kunina, unina wawapheka wenzela uyise isilovela esehla esiphundu, ayesikhonzile. 15URibheka wathatha izingubo zakwanokusho zika-Esawu indodana yakhe endala, ayezibeke endlini yakhe, wazigqokisa uJakobe. 16Wamfaka izikhumba zamazinyane ezandleni, nasentanyeni yakhe eyayibushelelezi. 17Wayesemnika isilovela esehla esiphundu nesinkwa ayesibhakile.
18UJakobe wangena kuyise wathi: “Baba!”
Uyise wamphendula wathi: “Ngilapha, ungubani wena ndodana na?”
19UJakobe wathi kuyise: “Ngingu-Esawu izibulo lakho. Ngenze njengoba ubushilo. Phakama, uhlale, udle nansi inyama yenyamazane ukuze ungibusise.”
20U-Isaka wathi endodaneni yakhe: “Kwenzeke kanjani uyithole ngokushesha okungaka ndodana na?”
UJakobe wathi: “USimakade uNkulunkulu wakho ungiphe impumelelo ngasheshe ngayithola.”
21U-Isaka wathi kuJakobe: “Sondela eduzane ukuze ngikuthinte ndodana, ngizenelise ukuthi unguye ngempela u-Esawu noma qha.”
22UJakobe wasondela kuyise, wamthinta, wayesethi: “Izwi ngelikaJakobe, kodwa izandla ngezika-Esawu.”
23Wahluleka ukwehlukanisa ukuthi lona nguJakobe, ngoba izandla zakhe zaziphuphuzela uboya njengezika-Esawu umnewabo, ngakho-ke wambusisa.
24Wathi: “Ngabe uyiyo ngempela indodana yami u-Esawu na?”
Wathi: “Nginguye.”
25U-Isaka wathi: “Yilethe kimi, ngidle inyama engiyilungiselwe yindodana yami, bese ngikubusisa.”
Wayiletha kuye, wadla, wamlethela newayini, wehlisa ngalo.
26U-Isaka uyise wathi kuye: “Sondela ungange ndodana.”
27Kuthe lapho esondela kuye emanga, u-Isaka wahogela iphunga ezingutsheni zakhe, wayesembusisa. Wathi:
“Iphunga lendodana yami
lifana nephunga lensimu ebusiswe nguSimakade.
28Sengathi uNkulunkulu angakwehlisela amazolo ezulu
avundise amasimu akho.
Makakuphe inala yamabele neyewayini.
29Sengathi abantu bangakukhonza.
Izizwe ngezizwe zikukhothamele.
Busa phezu kwabafowenu,
izizukulwane zikanyoko zikukhothamele.
Mabaqalekiswe bonke abakuqalekisayo,
babusiswe bonke abakubusisayo.”
U-Esawu Uzikhalela Ku-Isaka Ngesibusiso
30Lapho nje eqeda u-Isaka ukubusisa uJakobe, kungakabi sikhathi esingakanani ephumile, kwangena umnewabo u-Esawu evela ekuzingeleni. 31Naye wapheka isilovela esehla esiphundu, wasiletha kuyise, wathi kuyise: “Baba, phakama, uhlale udle inyama yenyamazane yendodana yakho, ukuze ungibusise.”
32Uyise u-Isaka wathi kuye: “Ungubani wena na?”
Wathi: “Ngiyindodana yakho, izibulo lakho u-Esawu.”
33U-Isaka wethuka wagedezela, wathi: “Ngubani kanti lona ozingele inyamazane wayiletha kimi, ngayidla ungakafiki, ngambusisa na? Yebo, uyohlala engobusisekileyo impela.”
34Lapho u-Esawu ezwa lawo mazwi kayise wadazuluka wakhala kalusizi, wathi kuyise: “Ngibusise nami baba!”
35Kepha wathi: “Umfowenu ungene lapha ngobuqili, wathatha isibusiso sakho.”
36U-Esawu wathi: “Akubanga yiphutha ukuba aqanjwe ngokuthi nguJakobe, ngokuba sekuze kwaba kabili engiqola. Wangephuca ilungelo lami lobuzibulo. Bheka manje usengithathele nesibusiso sami.”
Wayesethi kuyise: “Akusekho ngisho nesisodwa nje isibusiso ongibekele sona na?”
37U-Isaka wamphendula u-Esawu, wathi: “Sengimenze waba yinkosi yakho, nganikela abafowabo nodadewabo ukuba babe yizinceku zakhe, futhi ngamabela ukudla newayini. Yini-ke enye engingakwenzela yona ndodana yami na?”
38U-Esawu wathi kuyise: “Baba, ubunesibusiso esisodwa na? Ngibusise nami baba!”
Wadazuluka wakhala. 39Uyise wayesethi kuye:
“Uyohlala endaweni ekude nezwe elivundileyo,
lapho kungekho mazolo
avela phezulu ezulwini.
40 Uyophila ngenkemba yakho,
ube yisikhonzi somfowenu,
kodwa lapho usumvukela
uyolephula ijoka lakhe entanyeni yakho.”
41U-Esawu wamzonda uJakobe ngenxa yesibusiso uyise ambusisa ngaso. Wazindla enhliziyweni yakhe wathi: “Izinsuku zokulilela ubaba zingafika noma yinini. Uma sezedlule ngizombulala umfowethu uJakobe.”
42Bambikela uRibheka amazwi ka-Esawu izibulo lakhe ayesongela ngawo umnawakhe uJakobe, ngakho-ke wathi kuye: “Umnewenu usonga ukukubulala ukuze aduduzeke. 43Manje-ke ndodana yami ngilalele, baleka njengamanje uye kumfowethu uLabani eHarana, 44uhlale lapho isikhashana luze lubohle ulaka kumnewenu. 45Aze umnewenu axole, akhohlwe, ngiyobe sengikuthumelela ukuba ubuye lapho. Kungani ngizolahlekelwa yini nobabili ngalusuku lunye na?”
U-Isaka Uthumela UJakobe KuLabani
46URibheka wayesethi ku-Isaka: “Ngikhathazekile ngempilo yami ngenxa yabesifazane bamaHithi. Uma uJakobe naye engase aganwe ngenye yezintombi zamaHithi akule ndawo, ngiyothi ngisaphilelani na?”
