IGenesisi 11

₁Emhlabeni wonke abantu babekhuluma lulimi lunye. ₂Basuka empumalanga baze bayofika emathafeni eShinari, bahlala khona. ₃Babonisana, bathi: “Wozani sibumbe izitini, sizipheke emlilweni ukuze ziqine!”

Esikhundleni samatshe babumba izitini, esikhundleni sodaka benza ibhithumeni. ₄Base bethi: “Wozani sizakhele isithabathaba somuzi onombhoshongo omude ofinyelela esibhakabhakeni, ukuze ngawo sizakhele igama emhlabeni, singahlakazeki nezwe lonke!”

₅USimakade wehla ukuzobona umuzi nombhoshongo owawakhiwe ngabantu. ₆Wathi: “Bheka, laba bantu basizwe sinye, bakhuluma lulimi lunye. Lokhu kuseyisiqalo nje sezinto abazozenza. Manje sebezokwenza noma yini abazimisele ukuyenza. ₇Wozani sehle, siphambanise ulimi lwabo, khona bezogcina bengasezwani ukuthi omunye uthini komunye.”

₈USimakade wabahlakaza kanjalo-ke bagcwala umhlaba wonke, bakuyeka ukwakha umuzi. ₉Lowo muzi wabizwa ngokuthi yiBhabhele, ngokuba kulapho uSimakade aphambanisa khona ulimi lomhlaba wonke, wayesebahlakaza bagcwala umhlaba wonke.

₁₀Nanku umlando wezizukulwane zikaShemu. Kwaphela iminyaka emibili unqamukile uzamcolo, uShemu eseneminyaka eyikhulu, wazala u-Arifaksadi. ₁₁Esemzele u-Arifaksadi, waphila iminyaka engama-500: wayezele namanye amadodana namadodakazi.

₁₂Kuthe u-Arifaksadi eseneminyaka engama-35, wazala uShela. ₁₃Emva kokuzala uShela, u-Arifaksadi waphila iminyaka engama-403, wabuye wazala amadodana namadodakazi.

₁₄UShela wayeseneminyaka engama-30 ezala u-Ebhere. ₁₅Esemzele u-Ebhere, waphila iminyaka engama-403, wabuye wazala amadodana namadodakazi.

₁₆Kuthe u-Ebhere eseneminyaka engama-34, wazala uPhelegi. ₁₇Esemzele uPhelegi, u-Ebhere waphila iminyaka engama-430, wabuye wazala amadodana namadodakazi.

₁₈UPhelegi eseneminyaka engama-30, wazala uRegu. ₁₉Esemzele uRegu, uPhelegi waphila iminyaka engama-209, wabuye wazala amadodana namadodakazi.

₂₀URegu eseneminyaka engama-32, wazala uSerugi. ₂₁Esemzele uSerugi, uRegu waphila iminyaka engama-207, wabuye wazala amadodana namadodakazi.

₂₂USerugi eseneminyaka engama-30, wazala uNahori. ₂₃Esemzele uNahori, uSerugi waphila iminyaka engama-200, wabuye wazala amadodana namadodakazi.

₂₄UNahori eseneminyaka engama-29, wazala uThera. ₂₅Esemzele uThera, uNahori waphila iminyaka eyi-119, wabuye wazala amadodana namadodakazi.

₂₆Kuthe uThera eseneminyaka engama-70, wazala u-Abhrama, uNahori, noHarana.

₂₇Nanku umlando wezizukulwane zikaThera. UThera wazala u-Abhrama, uNahori, noHarana. UHarana wazala uLothi. ₂₈UHarana wafa kuqala kunoyise uThera ezweni ayedabuka kulo i-Uri lamaKhaledi. ₂₉U-Abhrama noNahori baganwa. U-Abhrama waganwa nguSarayi, uNahori waganwa nguMilikha, owayeyindodakazi kaHarana, owayezala u-Isikha. ₃₀USarayi wayeyinyumba, engenabantwana.

₃₁UThera wathatha indodana yakhe u-Abhrama noLothi owayezalwa nguHarana, nomalokazana wakwakhe uSarayi owayegane u-Abhrama, bonke base belifulathela i-Uri lamaKhaledi, balibangisa eKhanani. Bafika bahlala eHarana. ₃₂UThera waphila iminyaka engama-205, wafela eHarana.