KwabaseGalathiya 4

₁Manje ngithi, ngesikhathi indlalifa iseyingane, ayehlukile neze esigqileni nanxa iyinkosi yakho konke. ₂Iphansi komqaphi nomphathi, kuze kufike isikhathi esamiswa nguyise phambilini. ₃Nathi ngokunjalo, siseyizingane, sasiyizigqila phansi kwezimfundiso zomhlaba. ₄Kepha lapho sesifikile isikhathi esimisiweyo, uNkulunkulu wathumela iNdodana yakhe, eyazalwa ngowesifazane, izelwe phansi komthetho, ₅ukuze ikhulule labo abaphansi komthetho, samukele ukuba ngamadodana. ₆Lokhu ningamadodana, uNkulunkulu uthumele uMoya weNdodana yakhe ezinhliziyweni zethu, omemeza ethi: “Abba, Baba!” ₇Ngakho-ke awusesona isigqila, kodwa indodana; kepha uma uyindodana, uyindlalifa ngaye uNkulunkulu.

₈Ngesikhathi ningakamazi uNkulunkulu, naniyizigqila zonkulunkulu mbumbulu. ₉Lokhu manje seniyamazi uNkulunkulu noma seniyaziwa nguNkulunkulu, kungani pho seniphindela ezintweni ezingelutho, senifuna futhi ukuba yizigqila zazo na? ₁₀Senigcina izinsuku, izinyanga nezikhathi, neminyaka. ₁₁Nginovalo ngani, funa ngikhandlekele ize ngenxa yenu.

₁₂Ngifuzeni, ngokuba nami nginjengani, ngiyanincenga bazalwane. Aningonanga ngalutho. ₁₃Niyazi ukuthi ngenxa yokuba buthaka enyameni, ngashumayela ivangeli kini okokuqala, ₁₄nanxa ubuthaka bami babuyijoka kini, kodwa anizange ningicunukele noma ningenyanye. Nangamukela ngokungathi ngiyingelosi kaNkulunkulu, kwangathi nginguKhristu uqobo. ₁₅Pho selushonephi loluya gqozi enaninalo na? Ngiyaqinisa ukuthi naningawakhipha amehlo enu niwanike mina uma kwakunokwenzeka. ₁₆Ngabe sengiphenduke isitha senu ngokunitshela iqiniso na?

₁₇Bakhombisa intshisekelo ngani engenabuhle, bafuna ukunahlukanisa nami ukuze nihungeke nilandele bona. ₁₈Kepha kuhle ukuba nentshisekelo ngokuhle, kodwa makungabi nxa ngikhona kini kuphela. ₁₉Bantwana bami, enginezinseka ngani, uKhristu aze abunjwe kini; ₂₀ngifisa sengathi ngabe nginani manje, ukuze lishintshe iphimbo lokukhuluma kwami, ngenxa yokuba ngikhathazekile kakhulu ngani.

₂₁Ngitsheleni nina enifuna ukuba phansi komthetho, aniwuzwa yini umthetho na? ₂₂Ngokuba kulotshiwe ukuthi u-Abhrahama wayenamadodana amabili, enye kungeyesigqilakazi enye kungeyokhululekileyo. ₂₃Kepha eyesigqilakazi yayizelwe ngokwenyama, kodwa eyokhululekileyo izelwe ngokwesithembiso.

₂₄Lokhu kungukufanekisa nje, ngokuba laba bayizivumelwano ezimbili. Esinye ngesasentabeni iSinayi esiletha ubugqila, esinguHagari. ₂₅UHagari manje uyintaba iSinayi ese-Arabhiya, efanayo neJerusalema manje, ngokuba lisebugqileni nabantwana balo. ₂₆Kepha iJerusalema eliphezulu likhululekile, lingumama wethu. ₂₇Ngokuba kulotshiwe ukuthi:

₂₈Kepha nina bazalwane, ningabantwana besithembiso, njengo-Isaka. ₂₉Njengalokhu owayezelwe ngokwenyama wamhlupha owayezelwe ngokukaMoya, kusenjalo namanje. ₃₀Kepha uthini umbhalo na? Uthi: “Xosha isigqilakazi nendodana yaso, indodana yesigqilakazi ayinakulidla ifa kanye nendodana yokhululekileyo.”

₃₁Ngakho-ke bazalwane, asisibo abantwana besigqilakazi, kodwa singabantwana bokhululekileyo.