UHezekeli 48

₁“Nanka amagama ezizwe: UDani uyakuba nesabelo, kusukela emngceleni osenyakatho eceleni komgwaqo eHethiloni kuya eLebho Hamathi, kuze kuyofika eHazari Enani elingumngcele eDamaseku ngasenyakatho eceleni kweHamathi, kuya ohlangothini olusempumalanga kuze kube sentshonalanga. ₂U-Asheri uyakuba nesabelo ngasemngceleni wakwaDani, kusukela ohlangothini olusempumalanga kuze kube kolusentshonalanga.

₃“UNafethali uyakuba nesabelo ngasemngceleni wakwa-Asheri, kusukela ohlangothini olusempumalanga kuze kube kolusentshonalanga.

₄“UManase uyakuba nesabelo ngasemngceleni wakwaNafetali, kusukela ohlangothini olusempumalanga kuze kube kolusentshonalanga.

₅“U-Efrayimi uyakuba nesabelo ngasemngceleni wakwaManase, kusukela ohlangothini olusempumalanga kuze kube kolusentshonalanga.

₆“URubeni uyakuba nesabelo ngasemngceleni wakwa-Efrayimi, kusukela ohlangothini olusempumalanga kuze kube kolusentshonalanga.

₇“UJuda uyakuba nesabelo ngasemngceleni wakwaRubeni, kusukela ohlangothini olusempumalanga kuze kube kolusentshonalanga.

₈“Ngasemngceleni wakwaJuda, kusukela ohlangothini olusempumalanga kuze kube kolusentshonalanga, kuyakuba ngumnikelo eniyakunikela ngawo; ububanzi bube ngamakhubhithi ayizi-25 000, ubude bube njengesinye sezabelo kusukela ohlangothini olusempumalanga kuze kube kolusentshonalanga. Indlu engcwele iyakuba phakathi naso.

₉“Umnikelo eniyakunikela ngawo kuSimakade uyakuba ngamakhubhithi ayizi-25 000 ubude, ububanzi bube ngayizi-10 000. ₁₀Nanku umnikelo ongcwele: owabaphristi uyakuba ngamakhubhithi ayizi-25 000 ngasenyakatho, entshonalanga ube ayizi-10 000 ububanzi, empumalanga ube ayizi-10 000 ububanzi, nangaseningizimu ube ayizi-25 000 ubude. Indlu engcwele kaSimakade iyakuba phakathi nawo. ₁₁Uyakuba ngowabaphristi, abehlukaniselweyo emadodaneni kaZadoki, abagcine inkonzo yami; abangadukanga ngesikhathi kuduka abakwa-Israyeli, njengoba kwaduka abaLevi. ₁₂Kuyakuba ngumnikelo okhethekileyo kubo, umnikelo wezwe, endaweni engcwelengcwele, ngasemngceleni wabaLevi.

₁₃“Maqondana nomngcele wabaphristi, abaLevi bayakuba nesabelo esingamakhubhithi ayizi-25 000 ubude, ububanzi bube ayizi-10 000, bonke ubude bube ayizi-25 000, ububanzi bube ayizi-10 000. ₁₄Abayukuthengisa ngawo, bangananiselani ngawo; lena yindawo ekhethekileyo yezwe, bangalidluliseli komunye umuntu izwe, ngokuba lingcwele kuSimakade.

₁₅“Indawo eseleyo engamakhubhithi ayizi-5 000 ububanzi nangayizi-25 000 ubude, iyakuba ngengengcwele; ibe ngeyomuzi, eyokwakha, neyamadlelo. Umuzi uyakuba phakathi nayo. ₁₆Nazi izilinganiso zalo izwe: uhlangothi olusenyakatho kuyakuba ngamakhubhithi ayizi-4 500, oluseningizimu kube ayizi-4 500, olusempumalanga kube ayizi-4 500, nolusentshonalanga kube ayizi-4 500. ₁₇Umuzi uyakuba namadlelo: ngasenyakatho kuyakuba ngamakhubhithi angama-250, eningizimu abe ngama-250, empumalanga abe ngama-250, nangasentshonalanga abe ngama-250. ₁₈Indawo eseleyo emaqondana nendawo yomnikelo ongcwele, ubude bayo buyakuba ngamakhubhithi ayizi-10 000 ngasempumalanga, nayizi-10 000 ngasentshonalanga, kuqondane nomnikelo ongcwele. Izithelo zayo ziyakuba ngukudla kwabasebenza emzini. ₁₉Abasebenza emzini bayakuwulima, bevela kuzo zonke izizwe zakwa-Israyeli. ₂₀Wonke umnikelo uyakuba ngamakhubhithi ayizi-25 000, nayizi-25 000, ninikele ngomnikelo ongcwele, unezinhlangothi ezine nefa lomuzi.

₂₁“Okuseleyo kuyakuba ngokwesikhulu ngapha nangapha komnikelo ongcwele, nefa lomuzi maqondana namakhubhithi ayizi-25 000 zomnikelo ngasemngceleni empumalanga, nasentshonalanga maqondana namakhubhithi ayizi-25 000 ngasemngceleni entshonalanga, kuqondane nezabelo, kube ngokwesikhulu. Umnikelo ongcwele nendlu engcwele kuyakuba phakathi nakho. ₂₂Isabelo sabaLevi nendawo yomuzi kuyakuba phakathi kokwesikhulu, kuthi okwesikhulu kube phakathi komngcele wakwaJuda nomngcele wakwaBhenjamini.

₂₃“Izizwe eziseleyo-ke: UBhenjamini uyakuba nesabelo, kusukela ohlangothini olusempumalanga kuze kube kolusentshonalanga.

₂₄“Ngasemngceleni wakwaBhenjamini, uSimeyoni uyakuba nesabelo, kusukela ohlangothini olusempumalanga kuze kube kolusentshonalanga.

₂₅“Ngasemngceleni wakwaSimeyoni, u-Isakhare uyakuba nesabelo, kusukela ohlangothini olusempumalanga kuze kube kolusentshonalanga.

₂₆“Ngasemngceleni wakwa-Isakhare, uZebuloni uyakuba nesabelo, kusukela ohlangothini olusempumalanga kuze kube kolusentshonalanga.

₂₇“Ngasemngceleni wakwaZebuloni, uGadi uyakuba nesabelo, kusukela ohlangothini olusempumalanga kuze kube kolusentshonalanga.

₂₈“Ngasemngceleni wakwaGadi, ohlangothini oluseningizimu ngaseningizimu, umngcele uyakusuka eThamari kuze kube semanzini eMeribhathi Kadeshi nasemfudlaneni, ngasoLwandle Olukhulu.

₂₉“Yilo leli lizwe eniyakulehlukanisa ngonkatho, libe yifa lezizwe zakwa-Israyeli. Ilezo-ke izabelo zazo, kusho iNkosi uSimakade.”

₃₀“Nanka amasango okuphuma omuzi: Kusukela ohlangothini olusenyakatho kuyakuba ngamakhubhithi ayizi-4 500 ngokulinganisa. ₃₁Amasango omuzi ayakubizwa ngamagama ezizwe zakwa-Israyeli, amasango amathathu abe ngasenyakatho: elinye kuyakuba yisango lakwaRubeni, elinye kube ngelakwaJuda, elinye kube ngelakwaLevi.

₃₂“Nasohlangothini olusempumalanga kuyakuba ngamakhubhithi ayizi-4 500, namasango amathathu: elinye kube yisango lakwaJosefa, elinye kube ngelakwaBhenjamini, elinye kube ngelakwaDani.

₃₃“Nasohlangothini oluseningizimu kuyakuba yizi-4 500 ngokulinganisa, namasango amathathu: elinye kuyakuba yisango lakwaSimeyoni, elinye kube ngelakwa-Isakhare, elinye kube ngelakwaZebuloni.

₃₄“Ohlangothini olusentshonalanga kuyakuba ngamakhubhithi ayizi-4 500, namasango awo amathathu: elinye kuyakuba yisango lakwaGadi, elinye kube ngelakwa-Asheri, elinye kube ngelakwaNafetali.

₃₅“Kuyakuba ngamakhubhithi ayizi-18 000 nxazonke.

“Igama lomuzi, kusukela ngalolo lusuku, kuyakuthiwa USIMAKADE ULAPHA.”