UHezekeli 23

₁Izwi likaSimakade lafika kimi, lathi:

₂“Ndodana yomuntu, kwakukhona abesifazane ababili, amadodakazi amfazi munye. ₃Babefeba eGibhithe, bafeba kusukela ebusheni babo; amabele abo awotwawotwa khona, zapotozwa lapho izingono zobuntombi babo. ₄Amagama abo ngu-Ohola, okunguyena omdala, no-Oholiba udadewabo; babengabami, bazala amadodana namadodakazi. Amagama abo yilawa: u-Ohola yiSamariya kuthi u-Oholiba kube yiJerusalema.

₅“U-Ohola wafeba esengowami, wakhanukela izithandwa zakhe, abase-Asiriya, abangamabutho empi, ₆ababembethe okuluhlaza, ababusi, izikhulu, izinsizwa zonke ezingamageza, nabagibeli bamahhashi. ₇Wazinikela kubo, wafeba nabo, bengamadoda akhethekileyo ase-Asiriya; bonke wabakhanukela, wayesezingcolisa yena ngazo zonke izithombe zabo. ₈Nokho akabuyekanga ubufebe bakhe ayebuqale eGibhithe, ngokuba balala naye kusukela ebusheni bakhe, bacindezela izingono zobuntombi bakhe, bathululela kuye ubufebe babo.

₉“Ngalokho-ke ngamnikela esandleni sezithandwa zakhe, esandleni sabase-Asiriya abakhanukelayo. ₁₀Bamambula ubunqunu bakhe, bathatha amadodana akhe namadodakazi akhe. Yena bambulala ngenkemba, waba yisaga kwabesifazane, futhi wehlulelwa.

₁₁“Udadewabo u-Oholiba wakubona lokho, kodwa wonakala ngokwedlulele kunaye ekukhanukeni kwakhe, nasebufebeni bakhe obabedlula obukadadewabo. ₁₂Wakhanukela abase-Asiriya, izikhulu, ababusi, namabutho empi, ababehlobe ngemvunulo, bengabagibeli bamahhashi, bonke beyizinsizwa ezingamageza. ₁₃Ngabona ukuthi naye uzingcolisile; bobabili bahamba ndlelanye.

₁₄“Wanezezela ebufebeni bakhe, ngokuba wabona amadoda ayedwetshwe odongeni, imifanekiso yamaKhaledi eyayidwetshwe ngebomvu, ₁₅ebophe amabhande okhalo lwawo, ethwele amaqhiya emakhanda, wonke ebukeka njengezikhulu zaseBhabhele, edabuka eKhaledi. ₁₆Kwathi nje lapho ewabona, wawakhanuka, wathumela kuwo izithunywa eKhaledi. ₁₇Amadodana aseBhabhele eza kuye, alala naye, amngcolisa ngobufebe bawo; kwathi lapho esemngcolisile, amshiya dengwane. ₁₈Wabambula ubufebe bakhe, nobunqunu bakhe. Ngazehlukanisa naye njengoba ngangimlaxazile nodadewabo. ₁₉Kepha wabandisa ubufebe bakhe, ekhumbula izinsuku zobusha bakhe ayefebe ngazo eGibhithe. ₂₀Wawakhanukela amashende alapho, azinduku zawo zinjengezinduku zezimbongolo, nemiphambili yawo echitha njengeyamahhashi. ₂₁Wakulangazelela ukukhanuka kobusha bakho useseGibhithe, lapho izingono zakho zamabele obusha bakho zazipotozwa khona.

₂₂“Ngalokho-ke Oholiba, isho kanje iNkosi uSimakade, ithi: ‘Ngiyakukuvusela izithandwa zakho, umphefumulo wakho owehlukene nazo, ngizilethe kuwe zivela macala wonke, ₂₃abaseBhabhele, amaKhaledi wonke, iPhekodi, iShowa, iKhowa, bonke abase-Asiriya, izinsizwa ezingamageza, ababusi, nezikhulu zabo, nazo zonke izikhulu ezaziwa ngabagibeli bamahhashi, ₂₄bayakuza kuwe bakuthelekele ngezikhali, izinqola, okunamasondo, nesixuku sabantu, bayakukuvimbezela nxazonke ngamahawu nezihlangu, nezigqoko zempi. Ngiyakubanika igunya lokwehlulela, bayakukwehlulela ngezehlulelo zabo. ₂₅Ngiyakumelana nawe ngenxa yesikhwele enginaso ngawe, bakuphathe ngonya, banqume ikhala lakho nezindlebe zakho, kuthi abaseleyo bakini, bafe ngenkemba. Bayakuthatha amadodana akho namadodakazi akho, bese kuthi insali yakini, idliwe ngumlilo. ₂₆Bayakukuhlubula izingubo zakho, bakuqhwage imvunulo yakho ohlobe ngayo. ₂₇Ngiyakuyiqeda nya inkanuko yakho nobufebe bakho owabuqala kusukela eGibhithe. Awuyukukubheka lokho ngokukulangazelela, ungabe usalikhumbula futhi iGibhithe.’

₂₈“Ngokuba isho kanje iNkosi uSimakade, ithi: ‘Ngiyakukunikela esandleni salabo obazondayo, esandleni salabo umphefumulo wakho owehlukane nabo usubenyanya. ₂₉Bayakukuphatha ngenzondo, bakuqhwage konke lokho osukusebenzele, bakuphundle, usale unqunu, ubunqunu bobufebe bakho bube sobala. Ukukhanuka kwakho nobufebe bakho ₃₀yikhona okwenze lokho kuwe, ngokuba ufebile, walandela abezizwe, wazingcolisa wena uqobo ngezithombe zabo. ₃₁Uhambe ngendlela kadadewenu, ngalokho-ke ngiyakunikela indebe yakhe esandleni sakho.’

₃₂“Isho kanje iNkosi uSimakade, ithi:

₃₅“Ngalokho-ke isho kanje iNkosi uSimakade, ithi: ‘Ngokuba ungikhohliwe Mina, wangifulathela, uyakukuthwala ukungcola kwakho nobufebe bakho.’ ”

₃₆Wayesethi uSimakade kimi: “Ndodana yomuntu, uyakubehlulela yini o-Ohola no-Oholiba na? Batshele-ke ngezinengiso zabo. ₃₇Ngokuba baphingile, negazi lisezandleni zabo; baphinge nezithombe zabo, kwathi abantwana abangizalela bona babadabulisa emlilweni, baba ngukudla kwazo. ₃₈Benza lokhu futhi kimi: ngalolo lusuku abangcolisa ngalo indlu yami engcwele, bawona namasabatha ami. ₃₉Kwathi ngalolo lusuku benzela izithombe zabo umhlatshelo ngabantwana babo, base beya endlini yami engcwele ukuba bayingcolise. Uyabona, benza kanjalo-ke endlini yami.

₄₀“Bathumela izithunywa ukuba zilande amadoda avela kude. Kwathi lapho efika, wena wageza ngenxa yawo, wagqaba amehlo akho, wahloba ngobucwebecwebe, ₄₁wahlala esihlalweni esihle esintofontofo; itafula elilungisiweyo laliphambi kwaso, wabeka kulo impepho yami namafutha ami.

₄₂“Umsindo wesixuku esihlezi kahle wawuzwakala lapho; kwalethwa nezidakwa zasehlane, bazifaka amabhengele ezandleni zazo, nemiqhele emihle emakhanda azo. ₄₃Ngase ngithi ngalo osephele nya ngukufeba: ‘Impela bayakufeba naye, naye afebe nabo, ngokuba yilokho ayikho.’ ₄₄Balala naye njengalokhu amadoda elala nesifebe; balala kanjalo-ke no-Ohola no-Oholiba, abesifazane abakhanukayo. ₄₅Abantu abalungileyo bayakubehlulela ngokwehlulelwa kowesifazane ophingayo nangokwabesifazane abachitha igazi, ngokuba bayiziphingi, futhi negazi lisezandleni zabo.

₄₆“Ngokuba isho kanje iNkosi uSimakade, ithi: ‘Ngiyakuletha kubo isixuku esiyakumelana nabo, ngibanikele ekusatshisweni nasekuphangweni. ₄₇Isixuku siyakubakhanda ngamatshe, sibahlahlele ngezinkemba zaso, sibulale amadodana abo namadodakazi abo, sizishise ngomlilo izindlu zabo.

₄₈“ ‘Ngiyakukuqeda nya ukukhanuka ezweni, ukuze baxwayiswe bonke abesifazane ukuba bangakhanuki njengoba bekwenza nina. ₄₉Bayakukuphindisela kini ukukhanuka kwenu, nizithwale nina izono zezithombe zenu, niyakukwazi ukuthi Mina ngiyiNkosi uSimakade.’ ”