2 KwabaseKhorinte 3

₁Ngabe sesiqala ukuzincoma yini na? Kumbe nathi sidinga izincwadi zokusincoma kini noma ezivela kini njengoba abanye bezidinga na? ₂Nina niyincwadi yethu ebhalwe ezinhliziyweni zethu, eyaziwa futhi ifundwa ngabantu bonke. ₃Nibonakalisa ukuthi niyincwadi kaKhristu eyenziwe ngokukhonza kwethu, elotshwe hhayi ngoyinki, kepha ngoMoya kaNkulunkulu ophilayo. Ayilotshiwe ezibhebheni zamatshe, kodwa ezibhebheni eziyizinhliziyo zenyama.

₄Sinethemba elinjalo ngoKhristu kuNkulunkulu, ₅kungesikho ukuthi kukhona thina esingakukhomba sithi kuvela kithi, kodwa amandla ethu avela kuNkulunkulu, ₆okunguye owasenza safaneleka ukuba yizikhonzi zesivumelwano esisha kungesiso esomthetho, kodwa esikaMoya. Ngokuba incwadi ebhaliwe iyabulala, kodwa uMoya uyaphilisa.

₇Uma inkonzo yokufa eyayiqoshiwe ematsheni yafika inenkazimulo, kangangokuba abantwana bakwa-Israyeli babengakwazi ukububuka ubuso bukaMose, ngenxa yenkazimulo ephelayo eyayisebusweni bakhe, ₈pho inkonzo kaMoya ayiyukuba nenkazimulo enkulu kunayo na? ₉Ngokuba uma inkonzo yokulahlwa ibinenkazimulo, inkonzo yokulunga inenkazimulo enkulu kakhulu. ₁₀Nalokho okwakhazimuliswa, kwakukade kungenankazimulo, uma kuqhathaniswa nale nkazimulo edluleleyo. ₁₁Uma lokhu okuphelayo kwakunenkazimulo, pho kakhulu kangakanani inkazimulo yalokhu okumiyo njalo.

₁₂Ngakho-ke sinethemba elinjalo, senza ngesibindi, ₁₃asenzi njengoMose owamboza ubuso bakhe ngendwangu ukuze abakwa-Israyeli bangakuboni ukufiphala kwenkazimulo ephelayo. ₁₄Kepha yaba lukhuni ingqondo yabo, ngokuba kuze kube yinamuhla uma kufundwa isivumelwano esidala, leyo ndwangu isalokhu ihlezi ingembuliwe, kodwa yembulwa kuphela kuKhristu. ₁₅Yebo, kuze kube yinamuhla noma yinini lapho kufundwa uMose, indwangu isayimbozile inhliziyo yabo. ₁₆Kepha lapho umuntu ephendukela eNkosini, indwangu iyasuswa. ₁₇INkosi inguye uMoya, lapho kukhona khona uMoya weNkosi kunenkululeko. ₁₈Kepha thina sonke ubuso bethu obambuliwe esibuka inkazimulo yeNkosi ngokungathi esibukweni siyaguqulwa, sibe njengalowo mfanekiso, kusuka kuleli zinga lenkazimulo kuya kwelinye, lokhu kuvela eNkosini enguMoya.