1 KwabaseKhorinte 8

₁Mayelana nokuhlatshelwe izithombe siyazi ukuthi sonke sinolwazi ngalokho. Ulwazi luyakhukhumeza, kodwa uthando luyakha. ₂Uma umuntu ecabanga ukuthi wazi okuthile, akakazi njengokuba kufanele ukuba azi. ₃Kepha uma umuntu ethanda uNkulunkulu, lowo-ke uyaziwa nguye.

₄Ngakho-ke maqondana nokudla okuhlatshelwe izithombe, siyazi ukuthi isithombe yinto engelutho emhlabeni, nokuthi akakho omunye uNkulunkulu, munye kuphela. ₅Ngokuba nakuba kukhona okuthiwa onkulunkulu, noma ngabe kusezulwini noma kusemhlabeni, njengalokhu kukhona onkulunkulu abaningi namakhosi amaningi, ₆kodwa kithina kukhona uNkulunkulu munye, uYise, okuvela konke kuye, futhi esiphilela Yena, neNkosi yinye, uJesu Khristu, okungaye kukhona konke, nathi sikhona ngaye.

₇Kepha akusibo bonke abantu abanalolo lwazi. Abanye lokhu basajwayele izithombe kuze kube manje, basakudla ukudla sengathi kuhlatshelwe isithombe, nonembeza wabo obuthakathaka uyangcola. ₈Ukudla akusisondezi kuNkulunkulu, ngokuba uma singadli, asilahlekelwa yilutho, noma sidla, asizuzi lutho. ₉Kepha qaphelani, funa leli lungelo lenu libe yisikhubekiso kwababuthakathaka. ₁₀Ngokuba uma umuntu ebona wena onolwazi udla ethempelini lesithombe, ngabe unembeza walowo osebuthakathaka awuyukudideka yini, aze adle okuhlatshelwe isithombe na? ₁₁Lowo obuthakathaka uyakubhubha ngenxa yolwazi lwakho, umzalwane uKhristu afa ngenxa yakhe. ₁₂Kanjalo uma nona kubazalwane, nilimaza unembeza wabo obuthakathaka, nona kuKhristu. ₁₃Ngakho-ke uma ukudla kumkhubekisa umzalwane wami, angisoze ngayidla inyama kuze kube phakade, ukuze ngingamkhubekisi umzalwane wami.