1 KwabaseKhorinte 10

₁Angithandi bazalwane, ukuba ningazi ukuthi okhokho bethu bonke babephansi kwefu, bonke badabula olwandle, ₂bonke babhabhadiswa kuMose efini nasolwandle. ₃Bonke badla ukudla okufanayo komoya, ₄baphuza okufanayo komoya, ngokuba baphuza edwaleni lomoya elabalandelayo, lelo dwala lalinguKhristu. ₅Kepha uNkulunkulu akathokozanga ngeningi labo, ngakho-ke izidumbu zabo zasakazwa ehlane.

₆Lezo zinto zenzeka ukuze zibe yisibonelo kithi, ukuze singafisi okubi, njengokuba bona bakufisa. ₇Ningabi ngabakhonza izithombe njengabanye babo, ngokuba kulotshiwe ukuthi: “Abantu bahlala phansi ukuba badle, baphuze; basukuma, basina.”

₈Masingafebi njengokuba abanye babo bafeba, bafa ngalusuku lunye abayizi-23 000. ₉Masingamlingi uKhristu njengokuba abanye babo bamlinga, babhujiswa yizinyoka. ₁₀Maningakhonondi njengokuba abanye babo bakhononda, babhujiswa ngumbhubhisi.

₁₁Lezo zinto zenzeka kulabo ukuze zibe yisibonelo, ngokuba zilotshiwe ukusiyala thina, osekufike kithi izikhathi zokugcina. ₁₂Ngakho-ke lowo othi umile, makaqaphele ukuba angawi. ₁₃Anifikelwanga ngukulingwa okungenjengokwamuntu, kodwa uNkulunkulu uthembekile, akayukuvuma ukuba nilingwe ngokungaphezu kwamandla enu. Kepha kuyakuthi lapho nilingwa, anenze nibe namandla okuphunyuka, nibe namandla okubekezela.

₁₄Ngakho-ke bazalwane bami abathandekayo, balekelani ukukhonza izithombe. ₁₅Ngikhuluma njengakubantu abakhaliphileyo; nqumani nina ngalokhu engikhushoyo. ₁₆Indebe yesibusiso esiyibusisayo, ayisiyo yini inhlanganyelo yegazi likaKhristu na? Isinkwa esisihlephulayo asiyiyo yini inhlanganyelo yomzimba kaKhristu na? ₁₇Ngokuba isinkwa sinye, nokho thina esibaningi singumzimba munye, lokhu thina sonke sihlanganyela leso sinkwa sinye. ₁₈Bhekani u-Israyeli ngokwenyama. Labo abadla imihlatshelo abasibo yini abahlanganyela ne-althare na? ₁₉Pho ngichazani ngalokho na? Ngabe ngithi okuhlatshelwe isithombe kuwutho noma isithombe siwutho na? ₂₀Qha, kodwa ngithi: lokho okuhlatshwa ngabezizwe bakuhlabela amadimoni, kabakuhlabeli uNkulunkulu. Kangithandi ukuba nibe nenhlanganyelo namadimoni. ₂₁Anikwazi ukuphuza indebe yeNkosi kanye nendebe yamadimoni. Anikwazi ukuhlanganyela itafula leNkosi kanye netafula lamadimoni. ₂₂Kanti senza iNkosi ibe nesikhwele na? Ngabe sinamandla yini kunayo na?

₂₃Konke kuvunyelwe, kodwa akusizi konke; konke kuvunyelwe, kodwa akwakhi konke. ₂₄Makungabi bikho ozifunela okwakhe, kepha akube yilowo nalowo afunele omunye. ₂₅Konke okuthengiswa esilaheni kudleni, ningaphenyi lutho ngakho ngenxa kanembeza, ₂₆ngokuba umhlaba ungoweNkosi, nakho konke okukuwo. ₂₇Uma omunye wabangakholwayo enimema, nithanda ukuya lapho, kudleni konke okubekwa phambi kwenu, ningabuzi mbuzo ngenxa kanembeza. ₂₈Kepha uma kukhona othi kini: “Lokhu kuhlatshelwe izithombe,” ningalokothi nikudle ngenxa yalowo osho kanjalo nangenxa kanembeza. ₂₉Angisho unembeza wakho, kodwa unembeza walowo muntu. Kungani inkululeko yami ithiywe ngunembeza womunye na? ₃₀Uma ngidla ngokubonga, pho ngigxekelwani ngalokho engikubongayo na? ₃₁Ngakho-ke noma niyadla, noma niyaphuza, noma nenzani nje, konke kwenzeleni udumo lukaNkulunkulu. ₃₂Ningabi yisikhubekiso kubaJuda, kumaGriki, noma kulo ibandla likaNkulunkulu, ₃₃njengalokhu nami ngithokozisa bonke ngakho konke, ngingafuni okuzosiza mina kuphela, kodwa okusiza abaningi, ukuze basindiswe.