INGOMA YAZO IINGOMA 7

₁Azi kuhle ukunyathela kwakho ngeembadada, ntombi yenene!

Izimbo zamanqe akho zinjengezidanga,

Umsebenzi wezandla zengcibi.

₂Inkaba yakho sisidendeleko esiyinqila;

Masingasweli iwayini ephithikeziweyo;

Isisu sakho sisidimbilili sengqolowa,

Sibiyelwe ngeenyibiba.

₃Amabele akho amabini anjengamankonyana ebhadi,

Amankonyana amabini ebhadi, angamawele.

₄Intamo yakho injengenqaba yophondo lwendlovu;

Amehlo akho ngamachibi aseHeshbhon,

Ngasesangweni layo, inabantu abaninzi;

Impumlo yakho injengenqaba yaseLebhanon

Ebheke eDamasko.

₅Intloko yakho phezu kwakho injengeKarmele,

Ubuyakayaka bentloko yakho bunjengosinga olumfusa;

Ukumkani ukhonkxwe ngeenjiko zabo.

₆Azi ùmhle, azi ùmnandi,

Luthando, eziyolweni!

₇Iwonga lakho eli lifana nomthi wesundu;

Amabele akho afana nezihloko zomdiliya.

₈Ndathi, Ndiya kumínya emthini wesundu;

Ndiya kubambelela emagqabini awo;

Amabele akho makabe njengezihloko zomdiliya,

Nevumba lempumlo yakho libe njengeeapile;

₉Nekhuhlangubo lakho libe njengewayini le ilungileyo,

Ihla kamnandi kwintánda yam,

Ibanga ukuba uthethe umlomo wabaleleyo.

₁₀Mna ndingowentánda yam,

Kukum ukungxamela kwayo.

₁₁Hamba, ntánda yam, siphume siye emaphandleni,

Silale emizaneni.

₁₂Masivuke kusasa, siye ezidiliyeni,

Sibone ukuba umdiliya unamathupha na, iintyantyambo zawo zibhenqekile na,

Imirharnate ityatyambile na.

Ndokunika apho izincokoliso zam.

₁₃Amathuma apha anevumba;

Phezu kweminyango yethu ziziqhamo ngeziqhamo ezimnandi kakhulu, ezitsha kwanezidala,

Endiziqwebele wena, ntánda yam.