IINDUMISO 96

₁Vumani kuYehova ingoma entsha,

Vumani kuYehova, nonke hlabathi.

₂Vumani kuYehova, bongani igama lakhe,

Shumayelani iimini ngeemini iindaba ezilungileyo zosindiso lwakhe.

₃Balisani ezintlangeni uzuko lwakhe,

Balisani ezizweni zonke imisebenzi yakhe ebalulekileyo;

₄Ngokuba mkhulu uYehova, engowokudunyiswa kunene;

Uyoyikeka yena ngaphezu koothixo bonke.

₅Ngokuba bonke oothixo bezizwe àbanto zanto;

UYehova yena wenza amazulu.

₆Yindili nobungangamela phambi kwakhe,

Ngamandla nokuhomba engcweleni yakhe.

₇Mnikeni uYehova, nina mizalwane yezizwe,

Mnikeni uYehova uzuko namandla;

₈Mnikeni uYehova uzuko lwegama lakhe;

Thwalani umnikelo, nize ezintendelezweni zakhe.

₉Mnquleni uYehova, nivethe ezingcwele,

Thuthumelani phambi kwakhe, nonke hlabathi.

₁₀Yithini ezintlangeni, UYehova ngukumkani,

Liya kuzinza ngoko elimiweyo, lingashukumi,

Úya kugweba phakathi kwezizwe ngokuthe tye.

₁₁Liya kuvuya izulu,

Ligcobe ihlabathi;

Luya kugquma ulwandle, nenzaliseko yalo.

₁₂Liya kudlamka ilizwe, nento yonke ekulo,

Ize imemelele yonke imithi yehlathi

₁₃Phambi koYehova, ngokuba esiza,

Ngokuba esiza kugweba ihlabathi.

Úya kuligweba elimiweyo ngobulungisa,

Nezizwe ngokunyanisa kwakhe.