IINDUMISO 83

₁Thixo, musa ukuthi cwaka,

Musa ukuthi tu, musa ukuzola, Thixo.

₂Ngokuba nanzo iintshaba zakho zixokozela;

Abakuthiyayo baphakamisa intloko.

₃Bagqugula igqugula elinobuqhophololo ngabantu bakho,

Bacebisane ngabagushiweyo nguwe.

₄Bathi, Yizani sibethe bee shwaka, bangabi luhlanga,

Lingabi sakhunjulwa igama likaSirayeli.

₅Ngokuba bacebisana ngantliziyo-nye,

Benza umnqophiso ngawe:

₆Iintente zakwaEdom nezakwaIshmayeli,

AmaMowabhi namaHagari,

₇AmaGebhali nama-Amon nama-Amaleki,

AmaFilisti kunye nabemi baseTire;

₈Nama-Asiriya athelele kubo,

Baba yingalo koonyana bakaLote. (Phakamisani.)

₉Yenza kubo njengoko wenza ngako kumaMidiyan,

NakuSisera, nakuYabhin esihlanjeni seKishon.

₁₀Batshabalala e-Endore,

Baba ngumgquba wokugalelwa emhlabeni.

₁₁Bénzé bona, amanene abo ke, babe njengo-Orebhe nanjengoZebhe;

Zonke iinkosi zabo zibe njengoZebha nanjengo Tsalimuna;

₁₂Bona bathi,

Masiwahluthe abe ngawethu amakhaya kaThixo.

₁₃Thixo wam, bénzé babe njengesaqhwithi,

Njengomququ phambi komoya.

₁₄Njengomlilo odla ihlathi,

Njengedangatye lilenya intaba,

₁₅Yènjenjalo ukubasukela ngoqhwithela lwakho,

Ubakhwankqise ngomoya wakho ovuthuzayo.

₁₆Búzalise ubuso babo ngehlazo,

Balifune igama lakho, Yehova.

₁₇Mabadane bakhwankqiswe ngonaphakade,

Babe neentloni, badake;

₁₈Bazi ukuba wena, ugama linguYehova, unguwe wedwa

Osenyangweni phezu kwehlabathi lonke.