IINDUMISO 78

₁Wubekeleni indlebe umyalelo wam, bantu bakowethu,

Wathobeleni indlebe amazwi omlomo wam.

₂Ndiya kuwuvula umlomo wam ngomzekeliso;

Ndiya kumpompozisa iintsonkotha zamandulo;

₃Esakuváyo sakwazi,

Abasibaliseláyo oobawo.

₄Asiyi kukugusha koonyana babo;

Sobalisela isizukulwana esizayo iindumiso zikaYehova,

Namandla akhe, nemisebenzi yakhe ebalulekileyo awayenzayo.

₅Wamisa isingqiniso kwaYakobi,

Wabeka umyalelo kwaSirayeli,

Awawumisela oobawo,

Ukuba bawazíse oonyana babo;

₆Ukuze síwazi isizukulwana esizayo, oonyana abaza kuzalwa,

Basuke babalisele ababo oonyana;

₇Bayàme ngoThixo,

Bangazilibali izenzo ezincamisayo zikaThixo,

Bayilondoloze imithetho yakhe:

₈Bangabi njengooyise,

Isizukulwana esiyinjubaqa, esineenkani,

Isizukulwana esingayilungisanga intliziyo yaso,

Esimoya unganyanisanga kuThixo.

₉Oonyana bakaEfrayim, bexhobile, beziintoli ezinezaphetha,

Bajika ngemini yemfazwe.

₁₀Abawugcinanga umnqophiso kaThixo,

Abavumanga ukuhamba ngomyalelo wakhe;

₁₁Bazilibala izenzo zakhe ezincamisayo,

Nezibalulekileyo zakhe awababonisayo.

₁₂Phambi kooyise wenza ngokubalulekileyo

Ezweni lamaYiputa, emhlabeni waseTsohan.

₁₃Wàludabula ulwandle, wabaweza,

Wawamisa amanzi njengemfumba.

₁₄Wabakhapha ngelifu emini,

Ngokukhanya komlilo ubusuku bonke,

₁₅Walicanda iliwa entlango,

Wabaseza amanzi anzongonzongo kakhulu;

₁₆Wavelisa imiqukuqela yamanzi engxondorheni,

Wahlisa amanzi njengemilambo.

₁₇Baqokela noko ukona kuye,

Nokumphikisa Osenyangweni emqwebedwini.

₁₈Bamlinga uThixo ngentliziyo yabo,

Ngokuwubizela umphefumlo wabo ukudla.

₁₉Bathetha ngoThixo, bathi,

Únako na uThixo ukulungisa isithebe entlango?

₂₀Yabona, walibetha iliwa, abaleka amanzi,

Yakhukula nemilanjana;

Wóba nako na nokubanika ukutya,

Nokubalungiselela inyama abantu bakhe?

₂₁Weva ke uThixo, waphuphuma umsindo wakhe,

Watsha umlilo kwaYakobi,

Kwenyuka kwaya umsindo kwaSirayeli;

₂₂Ngokuba bengakholwanga kuThixo,

Bengakholosanga ngosindiso lwakhe.

₂₃Waziwisela ke umthetho iingqimba zamafu ngaphezulu,

Wazivula iingcango zezulu;

₂₄Wabanisela ngemana• ukuze badle,

Wabanika ingqolowa yasezulwini.

₂₅Umntu wadla isonka sOnamandla;

Wabathumela umphako bada badikwa.

₂₆Wandulula umoya wasempumalanga ezulwini,

Wawuqhuba ngamandla akhe umoya wasezantsi;

₂₇Wabanisela inyama njengothuli,

Neentaka ezinamaphiko njengentlabathi yolwandle;

₂₈Yawa phakathi kweminquba yabo,

Ngeenxa zonke emakhayeni abo.

₂₉Badla, bahlutha kakhulu,

Wabazisela ke inkanuko yabo.

₃₀Bengekashenxi enkanukweni yabo,

Kusekho ukudla kwabo emlonyeni wabo:

₃₁Kwenyuka umsindo kaThixo waya kubo,

Wabulala phakathi kwabatyebileyo babo,

Wawawisa amadodana akwaSirayeli.

₃₂Kuyo yonke loo nto bahambisa ngokona,

Àbakholwa yimisebenzi yakhe ebalulekileyo.

₃₃Wayiphelisa ke imihla yabo njengomphunga,

Neminyaka yabo ngokukhwankqisa.

₃₄Xa wathi wababulala, bamquqela;

Babuya bamquqela uThixo ngenyameko,

₃₅Bakhumbula ukuba uThixo uliliwa labo,

UThixo Osenyangweni ungumkhululi wabo.

₃₆Ke bamthomalalisa ngomlomo wabo,

Bamxokisa ngolwimi lwabo;

₃₇Intliziyo yabo ayaqina kuye,

Àbanyaniseka emnqophisweni wakhe.

₃₈Ke yena unemfesane,

Uxolela ubugwenxa ngocamagushelo, akonakalisi;

Wawubuyisa futhi umsindo wakhe,

Akabuxhoxha bonke ubushushu bakhe.

₃₉Wakhumbula ukuba bayinyama,

Bangumoya omkayo, ongabuyiyo.

₄₀Kukangaphi bemphikisa entlango,

Bemenza buhlungu enkangala!

₄₁Babuya bamlinga uThixo,

Bamenzakalisa oyiNgcwele wakwaSirayeli.

₄₂Àbasikhumbula isandla sakhe,

Imini awabakhulula ngayo embandezelweni;

₄₃Áwamisa ngayo imiqondiso yakhe eYiputa,

Nezimanga zakhe emhlabeni waseTsohan.

₄₄Wayiguqula imijelo yabo, yaba ligazi,

Ababa nakuyisela imiqukuqela yabo yamanzi.

₄₅Wathumela kubo iingcongconi, zabadla;

Namasele, abatshabalalisa.

₄₆Izilimo zabo wazinika iinkumbi ezinqunquthayo,

Ukuxelenga kwabo wakunika iinkumbi ezandayo.

₄₇Wawubulala ngesichotho umdiliya wabo,

Nemithombe yabo ngomkhenkce.

₄₈Wayinikela kwisichotho imfuyo yabo,

Nemihlambi yabo ngemibane.

₄₉Wathumela kubo ukuvutha komsindo wakhe,

Ukuphuphuma kwawo, nokubhavuma, nembandezelo,

Ibutho lezithunywa zobubi.

₅₀Wawulungelelanisela umendo umsindo wakhe,

Akawunqanda ekufeni umphefumlo wabo,

Wabunikela ubomi babo kwindyikitya yokufa.

₅₁Wababulala bonke abamazibulo eYiputa,

Iintlahlela zamandla obudoda ezintenteni zakwaHam.

₅₂Abantu bakhe wabafudusa njengezimvu,

Wabaqhuba njengomhlambi entlango;

₅₃Wabakhapha bekholosile, bengankwantyi;

Ke zona iintshaba zabo lwazigubungela ulwandle

₅₄Wabazìsa emdeni wakhe ongcwele,

Kule ntaba sayizuzayo isandla sakhe sokunene.

₅₅Wagxotha iintlanga ebusweni babo,

Wazenzela amaqashiso zalilifa elicandiweyo;

Izizwe zakwaSirayeli wazihlalisa ezintenteni zazo.

₅₆Kodwa bamlinga, bamphikisa uThixo Osenyangweni,

Àbazigcina izingqiniso zakhe,

₅₇Babuya umva, banginiza njengooyise.

Bajika njengesaphetha esikhohlisayo.

₅₈Bamqumbisa ngezingánga zabo,

Bamkhweletisa ngemifanekiso yabo eqingqiweyo.

₅₉Weva uThixo, waphuphuma umsindo,

Wawacekisa kakhulu amaSirayeli;

₆₀Wawulahla umnquba waseShilo,

Intente abeyimise esintwini;

₆₁Wawanikela ekuthinjweni amandla akhe,

Isihombo sakhe esandleni sombandezeli.

₆₂Wabanikela abantu bakhe kwikrele,

Umsindo wakhe waphuphumela ilifa lakhe.

₆₃Amadodana abo adliwa ngumlilo,

Iintombi zabo azagcotyelwa.

₆₄Ababingeleli babo bawa likrele,

Abahlolokazi babo àbalila.

₆₅Yaza yavuka njengobelele iNkosi,

Njengegorha elimemeleliswa yiwayini.

₆₆Yababetha ngasemva ababandezeli bayo,

Yabenza ingcikivo engunaphakade.

₆₇Yayicekisa intente yakwaYosefu,

Àyasinyula isizwe sakwaEfrayim.

₆₈Yanyula isizwe sakwaYuda,

Intaba yaseZiyon eyayithandayo.

₆₉Yayakha njengokuphakama kwezulu ingcwele yakhe,

Njengomhlaba lo awusekileyo ngonaphakade.

₇₀Yanyula uDavide umkhonzi wayo,

Yamthabatha ezibayeni zezimvu;

₇₁Yamthabatha elandela izimvu ezanyisayo,

Yamzisa ukuba aluse kwaYakobi abantu bayo,

KwaSirayeli ilifa layo.

₇₂Wabalúsa ke ngengqibelelo yentliziyo yakhe,

Wabakhapha ngokwazi kwezandla zakhe.