IINDUMISO 76

₁Waziwa kwaYuda uThixo,

Likhulu kwaSirayeli igama lakhe.

₂Umnquba wakhe waba seSalem,

Nekhaya lakhe eZiyon.

₃Wayaphula apho imibane yesaphetha,

Ingweletshetshe, nekrele, nezixhobo zemfazwe. (Phakamisani.)

₄Ùkhanyile, uyingangamsha ngaphezu kweentaba zokuqwenga.

₅Babhunyulwe abantliziyo iyimbalasane,

Balala umlala kanye,

Akazifumana izandla zawo onke amakroti.

₆Ekukhalimeni kwakho, Thixo kaYakobi,

Kwasindwa bubuthongo iinqwelo zokulwa namahashe.

₇Unguwena wena woyikekayo;

Ngubani na onokuma phambi kwakho, wakuba nomsindo?

₈Emazulwini usivakalisile isigwebo;

Loyika ihlabathi, lazola,

₉Ekusukeni kukaThixo ukuba agwebe,

Abasindise bonke abalulamileyo behlabathi. (Phakamisani.)

₁₀Ngokuba ubushushu bomntu buya kuba ngumbulelo kuwe;

Ùya kuwabhinqa amasalela obushushu.

₁₁Bhambathisani, nisizalise isibhambathiso kuYehova uThixo wenu;

Bonke abamngqongileyo mabeze nezithabathaba kofanele kukoyikwa.

₁₂Úya kunqumla ukufutha kweengànga,

Uyoyikeka kookumkani behlabathi.