IINDUMISO 74

₁Yini na Thixo, ukuba uhlale usihlambile,

Uqhume umsindo wakho kwizimvu zedlelo lakho?

₂Líkhumbule ibandla lakho olithengileyo kwakudala,

Olikhululeyo, laba sisizwe selifa lakho;

Intaba yaseZiyon, ohleli kuyo.

₃Phakamisa ukunyathela kwakho, ukuya kumanxuwa ahlala ehleli:

Utshaba luvivé into yonke engcweleni.

₄Bábharhula ababandezeli bakho endaweni yokuhlangana phakathi;

Bamisa eyabo imiqondiso, yaba yiyo eyimiqondiso.

₅Kwanga kungenelwe

Intshinyela yemithi ngezixengxe.

₆Kungoku, uqoqo lwayo lonke

Balucanda ngamazembe neengxobonga.

₇Bayifaka umlilo ingcwele yakho;

Bawuhlambela ngokuwuwisela emhlabeni umnquba wegama lakho.

₈Bathi ezintliziyweni zabo, Siya kubanyanzelela phantsi kuphele;

Bazitshisile zonke iindawo zikaThixo zokuhlangana ezweni apha.

₉Imiqondiso yethu asiyiboni,

Akusekho mprofeti;

Kúthi akukho waziyo ukuba koda kuse phi na kunjalo.

₁₀Kunini na, Thixo, umbandezeli engcikiva?

Utshaba luhleli luligiba igama lakho?

₁₁Usifinyezeleni na isandla sakho, nesokunene sakho?

Sírhole esifubeni sakho, ulugqibe.

₁₂Ke uThixo nguKumkani wam kwakumandulo,

Ulosebenza usindiso phakathi kwehlabathi lonke.

₁₃Nguwe owahlula ulwandle ngamandla akho,

Owaphula iintloko zeengwenya emanzini.

₁₄Nguwe owaxhaxha iintloko zeleviyatan,•

Wazinika zakukudla kubantu, kubemi bomqwebedu.

₁₅Nguwe owagqobhoza yayimithombo, yayimilanjana;

Nguwe owomisa imilambo engomiyo.

₁₆Yeyakho imini, bobakho nobusuku;

Nguwe owalungisa ukukhanya nelanga.

₁₇Nguwe owamisa yonke imida yehlabathi;

Ihlobo, nobusika, nguwe owazibumbayo ezo zinto.

₁₈Khumbula oku; utshaba lungcikiva uYehova,

Abantu abanobudenge baligibile igama lakho.

₁₉Musa ukuwunikela erhamncweni umphefumlo wehobe lakho;

Ungahlali uwulibele umhlambi wakho oziintsizana.

₂₀Bheka emnqophisweni,

Ngokuba iindawo ezimnyama zelizwe zizele zizindlu zogonyamelo.

₂₁Makangabuyi otyumkileyo ehlazisiwe;

Makalidumise igama lakho olusizana nolihlwempu.

₂₂Khawusuk' ume, Thixo, ubambane nababambene nawe;

Khumbula ukukungcikiva kwesidenge yonke imini.

₂₃Musa ukulilibala izwi lababandezeli bakho,

Ukungxola kwabasukela phezulu kuwe, okuhlala kunyuka.