IINDUMISO 69

₁Ndísindise, Thixo;

Ngokuba amanzi andifikele, ada eza emphefumlweni.

₂Nditshonile eludakeni olunzulu, akukho kuma;

Ndingene emmbithini onamanzi, umsinga uyandintywilisela.

₃Ndidiniwe kukudanduluka; womile umqala wam;

Aphelile amehlo am; mna ndilindele kuThixo.

₄Abandithiyayo ngelizé baninzi ngaphezu kweenwele zentloko yam;

Baninzi abandibangisayo, abaziintshaba zam bexoka;

Into endingayiphanganga bathi mandiyibuyise.

₅Thixo, wena uyakwazi ukumatha kwam;

Namatyala am akanakugushwa kuwe.

₆Mabangadani ngam abakuthembayo, Nkosi yam, Yehova wemikhosi;

Mabangangcikivwa ngam abakufunayo, Thixo kaSirayeli.

₇Ngokuba ndithwele ingcikivo ngenxa yakho;

Ihlazo libugqubuthele ubuso bam;

₈Ndingowasemzini kubazalwana bam;

Ndingowolunye uhlanga kubantwana bakama:

₉Ngokuba lindidlile ikhwele ngenxa yendlu yakho:

Iingcikivo zabakungcikivayo ziwé phezu kwam.

₁₀Mna, umphefumlo wam walila, uzila ukudla;

Oko kwaba yingcikivo kum.

₁₁Iingubo zam zaba zezirhwexayo,

Ndaba yinto yokuzekelisa kubo.

₁₂Bathetha ngam abahleli esangweni;

Ndiyingoma yamanxila.

₁₃Ke mna ndithandaza kuwe, Yehova, ngexesha elikholekileyo:

Thixo, ngobuninzi benceba yakho,

Ndíphendule ngenyaniso yosindiso lwakho.

₁₄Ndílangule eludakeni, ndingatshoni;

Mandihlangulwe kwabandithiyayo nasemimbithini enamanzi.

₁₅Mawungandintywiliseli umsinga wamanzi;

Ingandiginyi inzulu;

Iqula malingandivingceli ngomlomo walo

₁₆Ndíphendule, Yehova, ngokuba ilungile inceba yakho,

Ngangobuninzi bemfesane yakho ndíbheke.

₁₇Musa ukubusithelisa ubuso bakho kumkhonzi wakho,

Ngokuba ndibandezelekile; khawuleza undiphendule.

₁₈Sondela emphefumlweni wam, uwukhulule;

Ngenxa yeentshaba zam ndíkhulule.

₁₉Wena uyakwazi ukungcikivwa kwam, nokudaniswa kwam, nokuhlazwa kwam;

Baphambi kwakho bonke abandibandezelayo.

₂₀Ingcikivo yaphula intliziyo yam, ndaphantsa ukufa;

Ndathemba ukukhuzwa, akwabakho;

Nokuthuthuzelwa, andakufumana.

₂₁Ukudla bándinika inyongo;

Ekunxanweni kwam bándiseza iviniga.

₂₂Isithebe sabo phambi kwabo masibe ngumgibe;

Sibe sisirhintyelo kwabanemasi.

₂₃Makabe mnyama amehlo abo, bangaboni,

Usigxadazèlise isinqe sabo amaxesha onke.

₂₄Báphalazele ngobhavumo lwakho,

Kubafikele ukuvutha komsindo wakho.

₂₅Ingqili yabo mayibe senkangala,

Ezintenteni zabo kungahlali mntu;

₂₆Ngokuba bayamsukela obethwe nguwe,

Bancokole ngomvandedwa wobahlabileyo wena.

₂₇Yongeza ubugwenxa ebugwenxeni babo,

Bangàngeni ebulungiseni bakho.

₂₈Mabacinywe encwadini yobomi,

Bangàbhalwa namalungisa.

₂₉Ke mna ndilusizana, ndinomvandedwa;

Usindiso lwakho, Thixo, malundise engxondeni.

₃₀Ndiya kulidumisa igama likaThixo ngokuvuma,

Ndilenze likhulu ngokubulela.

₃₁Oko kuya kukholeka kuYehova ngaphezu kweenkunzi ezintsha,

Ezineempondo neempuphu.

₃₂Bebona abalulamileyo, bovuya;

Nina bamquqelayo uThixo, intliziyo yenu mayiphile.

₃₃Ngokuba uYehova uyaweva amahlwempu,

Akabadeli ababanjiweyo bakhe.

₃₄Malimdumise izulu nomhlaba,

Ulwandle nento yonke enambuzelayo kulo.

₃₅Ngokuba uThixo uya kuyisindisa iZiyon, ayakhe imizi yakwaYuda,

Bahlale khona, bayimé;

₃₆Ilidle ilifa imbewu yabakhonzi bakhe;

Bahlale kuyo abalithandayo igama lakhe.