IINDUMISO 5

₁Wabekele indlebe amazwi am, Yehova,

Kúqonde ukucamanga kwam.

₂Libázele indlebe izwi lokuzibika kwam, Kumkani wam, Thixo wam;

Ngokuba ndithandaza kuwe.

₃Yehova, ùya kuliva izwi lam kwakusasa,

Kwakusasa ndiya kuwusingisa kuwe umthandazo wam, ndibonisele.

₄Ngokuba wena akunguThixo onanze okungendawo,

Akanakuphambukela kuwe onobubi.

₅Abanakuma abaqhayisi phambi kwamehlo akho;

Ùyabathiya bonke abasebenzi bobutshinga.

₆Ùyabatshabalalisa abathetha amanga;

Indoda enegazi nenkohliso ilisikizi kuYehova.

₇Ke mna, ndinokungena endlwini yakho ngenceba yakho eninzi,

Ndiqubude, ndibhekise etempileni yakho engcwele ngokukoyika.

₈Yehova, ndíkhaphe ngobulungisa bakho ngenxa yabandilaleleyo;

Yilungelelanise indlela yakho phambi kwam.

₉Ngokuba emlonyeni wabo akukho nto imiyo,

Umbilini wabo ngumeyeliselo;

Lingcwaba elivuliweyo umqala wabo;

Bathetha okugudileyo ngolwimi lwabo.

₁₀Báthwalise ityala, Thixo;

Makatshitshe amaqhinga abo;

Elukreqweni lwabo oluninzi bátyhale,

Ngokuba bakuphikisile.

₁₁Mabavuye bonke abazímela ngawe,

Bamemelele ngonaphakade, ubakhusele;

Badlamke ngawe abalithandayo igama lakho.

₁₂Ngokuba wena uyalisikelela ilungisa, Yehova,

Ùlihlanganisele ngenkoliseko njengekhaka.