IINDUMISO 48

₁Mkhulu uYehova, engowokudunyiswa kunene

Emzini kaThixo wethu, entabeni yakhe engcwele.

₂Intle ukuphakama kwayo, yimihlali yehlabathi lonke

Intaba yaseZiyon, intlomo yasentla,

Umzi woKumkani omkhulu.

₃UThixo, ezingxandeni zawo ezinde,

Wazélwa ukuba yingxonde.

₄Kuba nâbo ookumkani babenqophisene,

Bawela beza kunye;

₅Bakuthi ukubona, àbakhuluma;

Bakhwankqa, babaleka buphuthuphuthu;

₆Babanjwa khona kukuthuthumela,

Kukuzibhijabhija njengozalayo.

₇Ngomoya wasempumalanga

Ùyazivitha iinqanawa zaseTarshishe.

₈Njengoko sikuvileyo, siboné kunjalo

Emzini kaYehova wemikhosi, emzini kaThixo wethu:

UThixo uyawuzinzisa ngonaphakade. (Phakamisani.)

₉Sayikhumbula, Thixo, inceba yakho

Phakathi kwetempile yakho.

₁₀Njengoko linjalo igama lakho, Thixo,

Lunjalo udumiso lwakho,

Kwesa eziphelweni zehlabathi;

Isandla sakho sokunene sizele bubulungisa.

₁₁Mayivuye intaba yaseZiyon,

Agcobe amagxamesi akwaYuda,

Ngenxa yezigwebo zakho.

₁₂Yijikelezeni iZiyon, niyizunguleze;

Zibaleni iinqaba zayo ezinde.

₁₃Gqalani ungqameko lomsele wayo;

Candani ezingxandeni zayo ezinde;

Ukuze nibalisele isizukulwana esizayo,

₁₄Ukuba lo Thixo nguThixo wethu ngonaphakade kanaphakade,

Yena uya kusikhapha kude kuse ekufeni.