IINDUMISO 45

₁Intliziyo yam iphuphuma ilizwi elihle,

Ndisithi, Into endiyenzayo isingise kukumkani;

Ulwimi lwam lusiba lombhali okhawulezayo.

₂Ùmhle wamhle ngaphezu koonyana babantu;

Kugalelwe ubumnandi emlonyeni wakho;

Ngenxa yoko úkusikelele uThixo wakho ngonaphakade.

₃Bhinqa ikrele lakho ethangéni, gorha,

Bhinqa indili yakho nobungangamela bakho.

₄Tyhudisa, ukhwele uhambe, únobungangamela bakho,

Ngenxa yenyaniso, nolulamo olunobulungisa.

Sikuyale ngezinto ezoyikekayo isandla sakho sokunene.

₅Iintolo zakho zitsolile;

Kuya kuwa izizwe phantsi kwakho;

Zitsolile entliziyweni yeentshaba zokumkani.

₆Itrone yakho, itrone kaThixo, ingunaphakade kanaphakade;

Yintonga ethe tye intonga yobukumkani bakho.

₇Ùthanda ubulungisa, uthiyé okungendawo;

Ngenxa yoko úkuthambisile uThixo, uThixo wakho,

Ngeoli yemihlali ngaphezu kwabalingane bakho.

₈Ziyimore• nehaloti• nekasiya• iingubo zakho zonke;

Emabhotweni eempondo zeendlovu uhadi lukuvuyisile.

₉Kukho iintombi zokumkani phakathi kwabathandekayo bakho;

Ukumkanikazi umi ngasekunene kwakho,

Enxibe igolide ecikizekileyo yakwaOfire.

₁₀Yiva, ntombi, ubone, uthobe indlebe yakho,

Ubalibale abantu bakowenu, nendlu kayihlo;

₁₁Akùbunqwenela ubunzwakazi bakho ukumkani,

Wòqubuda kuye, ngokuba eyinkosi yakho.

₁₂Intombi enguTire, izityebi zabantu,

Ziya kukuncekelela ngomnikelo.

₁₃Bubuyokoyoko bodwa intombi yokumkani kweliphakathi igumbi.

Isambatho sayo sesilukwe igolide.

₁₄Isiwa kukumkani ineengubo ezimfakamfele;

Ziyilandela iintombi ezingowayo,

Zisiwa kuwe,

₁₅Zisiwa ngovuyo nangomgcobo,

Zingene ebhotweni lokumkani.

₁₆Endaweni yooyihlo iya kuba ngoonyana bakho;

Ùya kubamisa babe ngabathetheli ehlabathini lonke.

₁₇Ndiya kulikhankanya igama lakho kwizizukulwana ngezizukulwana zonke;

Ngenxa yoko izizwe ziya kubulela kuwe ngonaphakade kanaphakade.