IINDUMISO 40

₁Ndathembela, ndithembele kuYehova,

Wathoba, wakuva ukuzibika kwam.

₂Wandirhola emhadini wentshabalalo, naseludakeni lomgxobhozo,

Wazimisa eliweni iinyawo zam, wakuqinisa ukunyathela kwam.

₃Wabeka emlonyeni wam ingoma entsha, indumiso kuThixo wethu;

Abaninzi bayabona, boyike,

Bakholose ngoYehova.

₄Hayi, uyolo lwendoda emenze uYehova inkoloseko yayo,

Ingabheki kwabagwagwisayo, nakubanxaxhi abanamanga!

₅Yehova, Thixo wam, wena wenze okuninzi ngemisebenzi yakho ebalulekileyo,

Nangeengcinga zakho kuthi;

Akukho nto inokulinganiswa nawe;

Okanye bendiya kuyixela, ndithethe ngayo;

Ke ziyinkohla engenakubalwa.

₆Akunanzé mbingelelo namnikelo wakudla;

Iindlebe zam uzivulile;

Akubizi dini linyukayo nadini lasono.

₇Ndaza ndathi, Yabona,

Ndiyeza; encwadini esongwayo kubhaliwe ngam.

₈Ukwenza okulikholo kuwe, Thixo wam, ndikunanzile;

Nomyalelo wakho usezibilinini zam ngaphakathi.

₉Ndashumayela iindaba ezilungileyo zobulungisa ebandleni elikhulu;

Yabona, andiwuthintelanga umlomo wam;

Yehova, wena uyazi.

₁₀Ubulungisa bakho andibugqumanga phakathi kwentliziyo yam;

Ndákukhankanya ukuthembeka kwakho nosindiso lwakho;

Andiyikhanyelanga inceba yakho nenyaniso yakho ebandleni elikhulu.

₁₁Wena, Yehova, akuyi kuzithintela iimfesane zakho kum;

Inceba yakho nenyaniso yakho iya kuhlala indilondoloza.

₁₂Ngokuba zindijikele izinto ezimbi, ezide azaba nakubalwa;

Bundifikele ubugwenxa bam, andinakubukhangela;

Buninzi kuneenwele zentloko yam;

Ndimkelwe yintliziyo.

₁₃Ngamana, Yehova, wandihlangula;

Yehova, wakhawuleza wandinceda!

₁₄Mabadane babe neentloni kuphele

Abazungula umphefumlo wam ukuze bawuphephethe;

Mababuye muva bahlazeke

Ábananzé ukuba ndihlelwe bububi.

₁₅Mabamangaliswe ngumvuzo wehlazo labo

Abathi kum, Tshotsho! Tshotsho!

₁₆Mababe nemihlali bavuye ngawe bonke abakufunayo,

Abaluthandayo usindiso lwakho bahlale besithi,

Makenziwe mkhulu uYehova.

₁₇Mna ke ndilusizana, ndilihlwempu;

INkosi iya kundikhumbulela.

Umncedi wam nomsindisi wam nguwe;

Thixo wam, musa ukulibala.