IINDUMISO 25

₁Ndiwuphakamisela kuwe, Yehova, umphefumlo wam.

₂Thixo wam, ndikholosé ngawe,

Mandingadani;

Mazingandivuyeleli iintshaba zam.

₃Ewe, bonke abo bakuthembayo abayi kudana;

Kuya kudana abo banginiza ngelizé.

₄Ndázise iindlela zakho, Yehova,

Ndífundise umendo wakho.

₅Ndínyathelise enyanisweni yakho, undifundise;

Ngokuba ùnguThixo ongumsindisi wam;

Ndithembé wena yonke imihla.

₆Khumbula iimfesane zakho, Yehova, neenceba zakho;

Ngokuba kususela kwaphakade zikho.

₇Musa ukuzikhumbula izono zobutsha bam, nokreqo lwam;

Ndíkhumbule ngokwenceba yakho wena,

Ngenxa yokulunga kwakho, Yehova.

₈Úlungile, uthe tye uYehova;

Ngenxa yoko úyabayalela indlela aboni.

₉Úyabanyathelisa abalulamileyo emasikweni akhe,

Abafundise abalulamileyo indlela yakhe.

₁₀Zonke iindlela zikaYehova ziyinceba nenyaniso,

Kwabagcina umnqophiso wakhe nezingqino zakhe.

₁₁Ngenxa yegama lakho, Yehova, xolela ubugwenxa bam,

Ngokuba bukhulu bona.

₁₂Ngubani na ke umntu omoyikayo uYehova?

Wómyalela indlela aya kuyinyula.

₁₃Umphefumlo wakhe wohlala wonwabile,

Imbewu yakhe ilidle ilifa ilizwe.

₁₄Ukucweya kukaYehova kunabamoyikayo;

Ubazísa umnqophiso wakhe.

₁₅Amehlo am ahlala emi kuYehova,

Ngokuba nguye ozirholayo eluthánjeni iinyawo zam.

₁₆Ndíbheke, undibabale,

Ngokuba ndindodwa, ndibandezelekile.

₁₇Iimbandezelo zentliziyo yam ziphangalalisiwe;

Ndíkhuphe ekucuthekeni kwam.

₁₈Khangela ukucinezeleka kwam nokwaphuka kwam,

Uxolele zonke izono zam.

₁₉Zikhangele iintshaba zam, ngokuba zininzi;

Zindithiye ngentiyo egonyamelayo.

₂₀Wugcine umphefumlo wam, undihlangule;

Mandingadani, ngokuba ndizímela ngawe.

₂₁Ukugqibelela nokuthi tye makundilondoloze,

Ngokuba ndithembele kuwe.

₂₂Khulula uSirayeli, Thixo,

Ezimbandezelweni zakhe zonke.