IINDUMISO 22

₁Thixo wam, Thixo wam, undilahleleni na?

Ùkude ngani na ekusindisweni kwam, nasemazwini okubonga kwam?

₂Thixo wam, ndiyabiza emini, ungaphenduli;

Nasebusuku ndiyabiza, andithozanyiswa noko.

₃Ùngcwele ke wena,

Ungulohlala ezindumisweni zakwaSirayeli.

₄Oobawo bákholosa ngawe,

Bakholosa, wabasiza;

₅Bakhala kuwe, basinda;

Bakholosa ngawe, àbadana.

₆Ke mna ndingumbungu, andimntu;

Ndisisingcikivo soluntu, into edelekileyo ebantwini.

₇Bonke abandibonayo bayandigculela;

Bayasineka, bahlunguzela intloko;

₈Bathi, Makazilahlele kuYehova, amsize,

Amhlangule kaloku, ngokuba emthandile.

₉Ewe, nguwe umtyhobozisi wam esizalweni,

Inkolosisi yam ndisemabeleni kama.

₁₀Ndalahlelwa kuwe kwasesizalweni;

Kwasembilinini kama ubunguThixo wam.

₁₁Musa ukuba kude nam, ngokuba isondele imbandezelo,

Ngokuba akukho mncedi.

₁₂Ndingqongwe ziinkunzi ezininzi,

Ndihlanganyelwe zeziziimbalasane zaseBhashan.

₁₃Zindakhamele umlomo wazo,

Njengengonyama eqwengayo, egqumayo.

₁₄Ndiphalele njengamanzi,

Ahlukene onke amathambo am;

Yanjengomthwebeba intliziyo yam,

Inyibilikile phakathi kwezibilini zam.

₁₅Omile njengegophe amandla am,

Ulwimi lwam lunamathele ekhuhlangubeni lam;

Undibeka eluthulini lokufa.

₁₆Ngokuba izinja zindirhawule,

Ibandla labenzi bokubi lindingungele;

Bagqobhoza izandla zam neenyawo zam.

₁₇Ndinokuwabala onke amathambo am;

Bòna bayandijonga, bayandibonela,

₁₈Babelana ngeengubo zam,

Isambatho sam basenzela amaqashiso.

₁₉Ke wena, Yehova, musa ukuba kude;

Mandla am, khawuleza undincede.

₂₀Wuhlangule ekreleni umphefumlo wam,

Okuphela kwawo, ethupheni lenja.

₂₁Ndísindise emlonyeni wengonyama,

Nasezimpondweni zenqu ùya kundiphendula.

₂₂Ndiya kulazisa igama lakho kubazalwana bam,

Ndikudumise phakathi kwebandla, ndithi,

₂₃Nina nimoyikayo uYehova, mdumiseni;

Nonke, mbewu kaYakobi, mzukiseni,

Nimhlonele nina, mbewu yonke kaSirayeli.

₂₄Kuba azidelekanga, azibanga nazothe kuye iintsizi zolusizana;

Akabusithelisanga ubuso bakhe kuye;

Ekuzibikeni kwakhe kuye waphulaphula.

₂₅Ivela kuwe indumiso yam ebandleni elikhulu;

Nezibhambathiso zam ndiya kuzizalisa phambi kwabamoyikayo.

₂₆Baya kudla abalulamileyo, bahluthe;

Baya kudumisa uYehova abamngxamelayo.

Ngamana yaphila intliziyo yenu ngonaphakade!

₂₇Ziya kukhumbula zibuyele kuYehova zonke iziphelo zehlabathi,

Iqubude phambi kwakhe yonke imizalwane yeentlanga:

₂₈Ngokuba bobukaYehova ubukumkani,

Nguye umlawuli ezintlangeni.

₂₉Baya kudla, baqubude, bonke abatyebileyo behlabathi;

Baya kuguqa phambi kwakhe bonke abatshona eluthulini,

Abangàwugciniyo umphefumlo wabo.

₃₀Imbewu iya kumkhonza;

Kuya kubaliselwa isizukulwana ngayo iNkosi.

₃₁Baya kuza baxele ubulungisa bayo

Kubantu abaza kuzalwa, ukuba oko ukwenzile.