IINDUMISO 17

₁Búve, Yehova, ubulungisa; kubázele indlebe ukuhlahlamba kwam;

Wubekele indlebe umthandazo wam, ongengamlomo ukhohlisayo.

₂Ibango lam malivele ebusweni bakho,

Amehlo akho akhangele ngokuthe tye.

₃Ùyicikidile intliziyo yam; undivelele ebusuku;

Ùndinyibilikisile, akwafumana nto;

Ndíyinkqangiyele into embi, ayiyi kuwugqitha umlomo wam.

₄Malunga nemisebenzi yabantu, ngelizwi lomlomo wakho,

Mna ndizigcinile, andangena kwiindlela zamanyangaza.

₅Imikhondo yam ibambe iindlela zakho, Azashukuma iinyawo zam.

₆Mna ndinqula wena, ngokuba undiphendula, Thixo;

Ndíthobele indlebe yakho, kúve ukuthetha kwam.

₇Zibalule iinceba zakho, wena wabasindisayo abazímela ngawe,

Ngesandla sakho sokunene, ngenxa yabasukela phezulu kubo.

₈Ndígcine njengeliso, njengokhozo lwalo,

Ndísithelise ngesithunzi samaphiko akho,

₉Phambi kwabangendawo abandibhuqayo,

Phambi kweentshaba zam ngokwasemphefumlweni ezindingungelayo.

₁₀Zithe fithi kukutyeba;

Ngomlomo wazo zithetha ngekratshi.

₁₁Zindijikelezile ngoku ekuhambeni kwam;

Amehlo azo ziwamisele ukundinqumela emhlabeni.

₁₂Ukufana kwazo kunjengengonyama engxamele ukuqwenga,

Kunjengengonyama entsha ihleli entsithelweni.

₁₃Khawusuk' ume, Yehova,

Uyihlangabeze, uyiwise yona;

Wusindise umphefumlo wam kongendawo ngekrele lakho;

₁₄Kubafo, ngesandla sakho, Yehova,

Kubafo beli phakade, abasahlulo sikobu bomi;

Osizalisileyo isisu sabo ngeengqwebo zakho;

Bakholisile ngoonyana,

Ukuphuphuma kwabo bakushiya neentsapho zabo.

₁₅Mna ndiya kububona ubuso bakho ndisebulungiseni;

Ndiya kwaneliswa sisithomo sakho ekuvukeni kwam.