IINDUMISO 143

₁Yehova, yiva umthandazo wam, kubekele indlebe ukutarhuzisa kwam;

Ndíphendule ngokunyaniseka kwakho, ngobulungisa bakho.

₂Musa ukumsa ematyaleni umkhonzi wakho:

Ngokuba phambi kwakho akukho namnye uhleliyo olilungisa.

₃Ngokuba utshaba luwusukele umphefumlo wam,

Lubutyumzèle emhlabeni ubomi bam;

Lundihlalise ezindaweni ezimnyama, njengabafe ngonaphakade.

₄Utyhafile phakathi kwam umoya wam;

Imangalisiwe phakathi kwam intliziyo yam.

₅Ndikhumbula imihla yamandulo;

Ndicamngca ngemisebenzi yakho yonke,

Ndicamngca ngesenzo sezandla zakho.

₆Ndizolulela kuwe izandla zam,

Umphefumlo wam ukungxamele njengelizwe elibharhileyo. (Phakamisani.)

₇Khawuleza undiphendule, Yehova; úyaphela umoya wam.

Musa ukubusithelisa kum ubuso bakho,

Ndifàne nabahla baye emhadini.

₈Ndívise kwakusasa inceba yakho,

Ngokuba ndikholose ngawe.

Ndazise indlela endiya kuhamba ngayo:

Ngokuba ndiwuphakamisela kuwe umphefumlo wam.

₉Ndíhlangule ezintshabeni zam, Yehova.

Ndizímela ngawe.

Ndífundise ukwenza ikholo lakho, ngokuba unguThixo wam.

₁₀UMoya wakho olungileyo makandikhaphele ezweni elisithabazi.

₁₁Ngenxa yegama lakho, Yehova, ndiphilise;

Wúkhuphe embandezelweni umphefumlo wam ngobulungisa bakho.

₁₂Ngenceba yakho zibhangise iintshaba zam,

Ubatshabalalise bonke abawubandezelayo umphefumlo wam,

Ngokuba ndingumkhonzi wakho.